कोरोनाको उपचारमा मलेरियाको औषधि परीक्षण सुरु

वासिङ्टन डिसी - अमेरिकी राष्ट्रिय स्वास्थ्य इन्स्टिच्युट(एनआईएच) ले मलेरिया (औलो) रोगको उपचारमा प्रयोग हुने हाइड्रोक्सिक्लोरोक्विनलाई कोरोना भाइरसको उपचारका लागि परीक्षण गर्न औपचारिक अनुमति दिएको घोषणा गरेको छ।

दी हिलमा छापिएको एक रिपोर्टअनुसार टेनिसी राज्यको नेस्भिलस्थित भ्यान्डरबिल्ट विश्वविद्यालय मेडिकल सेन्टरमा क्लिनिकल परीक्षणमा सहभागी हुन एक जना कोरोना संक्रमित व्यक्तिले नाम लेखाएका छन्।

अमेरिकी राष्ट्रपति डोनाल्ड ट्रम्पले यो औषधि कोरोना संक्रमित व्यक्तिलाई उपयोगी हुने दाबी गर्दै आएका छन्।

समाचार अनुसार क्लिनिकल परीक्षणमा सहभागी हुन चाहनेलाई पहिलो दिन दिनको दुई पटक ४०० एमजीको क्लोरोक्विन दिइनेछ। त्यसपछि दुईदेखि पाँच दिनसम्म २०० एमजी औषधि दिनको दुई पटक (आठ डोज) दिइनेछ।
बुधबार अमेरिकी राष्ट्रपति ट्रम्पले भारतीय प्रधानमन्त्री नरेन्द्र मोदीलाई फोन गरी क्लोरोक्विन औषधि अमेरिकालाई आपूर्ति गर्न स्वीकार गरेकामा धन्यवाद दिएका थिए।
गत महिना अमेरिकी खाद्य तथा औषधि प्रशासन (एफडीए) ले आपतकालीन अवस्थामा कोरोना संक्रमित बिरामीलाई पनि मलेरियाको औषधि दिन सकिने बताएको थियो। एनआईएच अमेरिकाको मेडिकल अनुसन्धान संस्था हो। -रासस