भारतमा पाँच हजारभन्दा बढीलाई कोरोना संक्रमण, एक सय ६६ को मृत्यु

भारतमा कोरोना भाइरस रोग (कोभिड–१९)को संक्रमणबाट पाँच हजारभन्दा बढी प्रभावित भएका छन्।

स्वास्थ्य तथा परिवार कल्याण मन्त्रालयका अनुसार बिहीबार बिहानसम्म त्यहाँ कोरोनाबाट ज्यान गुमाउनेको संख्या एक सय ६६ पुगेको छ। यस्तै, कोरोना संक्रमितमध्ये चार सय ७२ जना उपचारपछि निको भएका छन्।

पछिल्लो दिनमा त्यहाँ तीव्ररूपमा संक्रमण फैलिएको विश्व स्वास्थ्य संगठन (डब्ल्यूएचओ)ले जनाएको छ। डब्ल्यूएचओका अनुसार पछिल्लो ९ दिनमा त्यहाँ चीन, अमेरिका, स्पेन, इरानलगायत मुलुकबाहेक बढी संक्रमण देखिएको छ।

भारतमा संक्रमितको मृत्युदर पनि बढी छ। त्यहाँ फ्रान्स, इरान, स्पेन, चीन र अमेरिकाभन्दा संक्रमण बढी देखिएको छ।

भारतमा कोरोना संक्रमणबाट महाराष्ट्र, तामिलनाडु, दिल्ली र उत्तरप्रदेश सबैभन्दा बढी प्रभावित छन्। महाराष्ट्रमा अहिलेसम्म एक हजार एक ३५ संक्रमित देखिएकोमा ७२ जनाको मृत्यु भएको छ।

यसैगरी तामिलनाडुमा सात सय ३८ जनामा कोरोना भाइरसको संक्रमण पुष्टि भएकोमा आठ जनाको ज्यान गएको छ। दिल्लीमा ६ सय ६९ जनामा संक्रमण देखिएको छ, जसमा नौ जनाको मृत्यु भएको छ।

उत्तर प्रदेशमा तीन सय ६१ जनामा भाइरसको संक्रमण देखिँएकोमा चार जनाको ज्यान गएको छ।