स्वाब संकलन गर्न सेनाको हेलिकप्टर स्वास्थ्यकर्मीसहित अछाम पुग्यो

अछाम - कोरोना भाइरस (कोभिड–१९) को नमुना परीक्षणको लागि स्वाब संकलन गर्न नेपाली सेनाको हेलिकप्टरमा स्वास्थ्यकर्मीको टोली अछाम पुगेको छ।

आइसोलेसनमा रहेका तथा जिल्ला बाहिरबाट आएर क्वारेन्टाइनमा बसेकाहरुको स्वाब संकलनका लागि टोली अछाम आइपुगेको हो। कोरोना भाइरसको लक्षणसँग मिल्दोजुल्दो भएका व्यक्तिहरुको स्वाब संकलन गरी परीक्षणका लागि काठमाडौं लगिने बताइएको छ।

टोलीले सुरुमा बयालपाटा अस्पतालमा क्षेत्र नं. १ अन्तर्गतका स्थानीय तहका हालै भारतबाट भित्रिएका कोरोना संक्रमणको आशंका गरिएकाहरुको स्वाब संकलन गरेको अस्पतालका निर्देशक डाक्टर बिकास गौचनले जानकारी दिए। कोरोनाको सम्भावित संक्रमणको आशंका गरिएका स्थानीय तहबाट सिफारिस गरिएका करिब ५० जनाको नमुना स्वाब संकलन गरिने बताइएको छ।

बयालपाटा अस्पतालमा नमुना संकलन पश्चात टोलीले आजै मंगलसेन र कमलबजारमा पनि नमुना स्वाब संकलन गर्ने र साँझ काठमाडौं फर्किने छ। स्वाबको रिपोर्ट ३ दिन भित्र आइसक्ने टोलीले जनाएको छ।