तेस्रो चरणको लकडाउन कार्यान्वयनमा प्रशासनको कडाइ

जनकपुरधाम– तेस्रो चरणको ‘लकडाउन’ कार्यान्वयन गराउन जनकपुरमा सुरक्षाकर्मीले थप कडाइ गरेको छ । दोस्रो चरणको ‘लकडाउन’ केही खुकलो देखिएपछि स्थाय प्रशासनले तेस्रो चरणको ‘लकडाउन’ कार्यान्वयन गराउन कडाइ गरेको हो ।

मंगलबार अपरान्हसम्म प्रहरीले जनकपुरबाट ‘लकडाउन’अवज्ञा गरेर चलाइएका १०६ सवारी साधन नियन्त्रणमा लिएको छ । ‘लकडाउन’को अवधिमा बिनाकारण सञ्चालन गरेका पाइएपछि जनकपुरको विभिन्न स्थानबाट यति संख्यामा सवारी साधनहरु नियन्त्रणमा लिइएको जिल्ला प्रहरी कार्यालय धनुषाले जनाएको छ । यसैगरी ‘लकडाउन’अवज्ञा गरेको भन्दै प्रहरीले एकजनालाई पक्राउ गरेको छ ।

बन्द भयो जनकपुरको तरकारी बजार

‘लकडाउन’को अवधिमा जनकपुरको रेलवे स्टेशननजिक सञ्चालन भइरहेको तरकारी बजार बन्द गरिएको छ । भीडभाड बढेपछि व्यापकआलोचना हुँदा स्थानीय प्रशासनले मंगलबारदेखि तरकारी बजार बन्द गराएको हो ।

सामाजिक दूरीको ख्यालै नगरी तरकारी बजार सञ्चालन भएपछि कोरोना संक्रमणको जोखिम रहेको भन्दै स्थानीय प्रशासनको चर्को आलोचना भएको थियो ।

भीडभाड धेरै भएपछि रेलवे स्टेशननजिकको तरकारी बजार बन्द गराइएको धनुषाका प्रमुख जिल्ला अधिकारी कोषहरि निरौलाले जानकारी दिए । ‘आमनागरिकलाई सुविधा होस् भनेर तरकारी बजार सञ्चालन गर्न अनुमति दिएका थियौं, तर अव्यवस्थित भयो, भीडभाड बढेर सामाजिक दूरी पालना भएन, त्यसैले बन्द गर्न लगाएका छौं,’ निरौलाले भने ।

‘लकडाउन’कार्यान्वयन गराउन केही हदसम्म सहरी क्षेत्रमा कडाइ भएपनि ग्रामीण क्षेत्रमा भने अझै खासै असर पर्न सकेको छैन । जनकपुर वरिपरि ग्रामीण क्षेत्रहरुमाअझै हाटबजार खुलेआम रुपले लाग्दै आइरहेको छ ।

प्रमुख जिल्ला अधिकारी निरौलाले ग्रामीण क्षेत्रमा पनि कडाइ गर्ने प्रयास भइरहेको बताए । ‘ग्रामीण क्षेत्रबारे हामीलाई पनि जानकारी आएको छ,’ उनले भने, ‘प्रहरी पनि पुग्ने गरेको छ । प्रहरी जाँदा सबै भाग्छन्, प्रहरी फर्कदा फेरी सबै जम्मा हुन्छन् । लकडाउन आफ्नै सुरक्षाको लागि हो भनेर सबैले बुझिदिनु पर्यो ।’