प्रदेश २ : मुख्यमन्त्री राहत कोषमा एक करोडभन्दा बढी रकम जम्मा

जनकपुरधाम– कोरोना महामारी नियन्त्रण गर्न प्रदेश २ सरकारले स्थापना गरेको मुख्यमन्त्री राहत कोषमा एक करोडभन्दा बढी रकम जम्मा भएको छ । राहत कोषमा सहयोग गर्ने अधिकांश बैंकहरु छन् भने राजनीतिक दलमा नेपाली कांग्रेसबाहेक अन्य कुनै दलले राहत कोषमा सहयोग गरेको छैन ।

नेपाली कांग्रेसले सोमबार मुख्यमन्त्री राहत कोषमा ४० लाख ७५ हजार रुपैयाँ सहयोग गरेको छ । प्रदेश २ स्थित आठवटै जिल्ला कार्यसमिति मार्फत कांग्रेसलाई यो रकम सहयोग गरेको हो । यसबाहेक कांग्रेसको प्रदेश २ संसदीय दलले मुख्यमन्त्री राहत कोषमा सबै प्रदेश सांसदले १० दिनको तलब दिने निर्णयसमेत गरेको छ ।

यसैगरी एनसीसी बैंकले पाँच लाख, लक्ष्मी बैंकले १० लाख, सिभिल बैंकले ५ लाख, मेगा बैंकले ५ लाख र गण्डकी विकास बैंकले ४ लाख सहयोग गरेको मुख्यमन्त्रीको निजी सचिवालयले जनाएको छ ।

मुख्यमन्त्री राहत कोषमा कुमारी बैंकले १० लाख, माछापुच्छ«े बैंकले १० लाख, नेपाल बैंक लिमिटेडले ५ लाख, सिटिजन्स बैंकले ७ लाख र कृषि विकास बैंकले १० लाख रुपैयाँ सहयोग गरेको छ ।

भाटभटेनी सुपर मार्केटले राहत कोषमा २५ लाख रुपैयाँ सहयोग गर्ने घोषणा गरेपनि हालसम्म रकम जम्मा नभएको मुख्यमन्त्रीको सचिवालयले जानकारी दिएको छ ।