चौतारामा घरघरमै स्वास्थ्य परीक्षण

सिन्धुपाल्चोक- सिन्धुपाल्चोकको चौतारा साँगाचोकगढी नगरपालिकाले चैत महिनाभित्र विदेशबाट आएका व्यक्ति तथा उनीहरूको परिवारका सदस्यको स्वास्थ्य परीक्षण घरघरमै गएर गर्ने भएको छ।

यसका लागि स्वास्थ्यकर्मीको टोली परिचालन गर्न लागिएको नगरपालिकाले जनाएको छ। नगरपालिकाको सोमबार बसेको बैठकले मेडिकल अधिकृतको नेतृत्वमा घरघरमा गएर स्वास्थ्य परीक्षण गर्ने निर्णय गरेको उपमेयर जानुका पराजुलीले बताइन्।

बैठकले कोरोना भाइरसको रोकथाम तथा नियन्त्रणका लागि ५० लाख रुपैयाँको कोष स्थापना गर्ने निर्णय गरेको छ। नगरपालिकाले दैनिक ज्याला मजदुरी गरी जीवन निर्वाह गर्ने, अतिविपन्न तथा चुलो बाल्नै कठिन भएका परिवारलाई राहत उपलब्ध गराउने भएको छ।

सरकारले जारी गरेको लकडाउनका कारण प्रभावित भएका विपन्न परिवारको वडाबाट लगत सङ्कलन गरी राहत उपलब्ध गराउने उपप्रमुख पराजुलीले जानकारी दिइन्।