जनकपुरमा कोरोना परीक्षण सुरु

जनकपुरधाम– प्रादेशिक अस्पताल जनकपुरमा कोरोना परीक्षण सुरु भएको छ । पीसीआर मेसिन जडान भएसँगै प्रादेशिक अस्पताल जनकपुरमा शुक्रबार बिहानदेखि कोरोना परीक्षण सुरु भएको हो ।

प्रादेशिक अस्पतालका प्रमुख डा.नागेन्द्र यादवले पीसीआर मेसिन जडान भएर कोरोना परीक्षण सुरु भएको जानकारी दिए । ‘पीसीआर मेसिन जडान भइसकेको छ, प्राविधिकहरु पनि तयार छन्, शंकास्पद बिरामीको स्वाब आएलगत्तै परीक्षण सुरु हुन्छ,’ यादवल भने ।

संघीय सरकारले कोरोना परीक्षण गर्न प्रादेशिक अस्पताल जनकपुरमा एउटा पीसीआर मेसिन पठाएको छ । काठमाण्डौंबाट आएका दुईजना प्राविधिक टोलीले पीसीआर मेसिन प्रादेशिक अस्पतालमा जडान गरेका छन् । प्राविधिक टोलीले विहिबार रातिसम्म काम गरेर मेसिन जडान गरेका हुन् ।

प्रादेशिक अस्पताल जनकपुरमा जडान गरिएको पीसीआर मेसिनबाट दैनिक १० वटा परीक्षण गर्न मिल्ने प्राविधिक टोलीका सदस्य सर्वेन्द्र मधुपले जानकारी दिएका छन् ।

प्रदेश २ मा पीसीआर मेसिन नहुँदा यसअघि शंकास्पद बिरामीको स्वाब परीक्षणको लागि काठमाण्डौंस्थित टेकु प्रयोगशाला पठाउने गरिन्थ्यो । जनकपुरमै मेसिन जडान भइसकेपछि अब शंकास्पद बिरामीको स्वाब परीक्षणको लागि काठमाण्डौं पठाउनुपर्ने झन्झट सकिएको प्रादेशिक अस्पतालका प्रमुख डा.यादवले बताए ।

यता कोरोना महामारी नियन्त्रण गर्न गठित निर्देशक समितिले प्रदेशभर ५० भेन्टिलेटर र दुईवटा पीसीआर मेसिन थप्न निर्देशन दिएको छ । मुख्यमन्त्री लालबाबु राउत संयोजक रहेको निर्देशक समितिले सम्बन्धित मन्त्रालय र कार्यकारी समितिलाई यस्तो निर्देशन दिएको हो ।

निर्देशक समितिले प्रादेशिक अस्पताल जनकपुरमा १०, नारायणी उपक्षेत्रीय अस्पताल वीरगंजमा १० र अन्य अस्पतालहरुमा ५÷५ वटा भेन्टिलेटर र राजविराजस्थित गजेन्द्रनारायण सिंह सगरमाथा अस्पतालमा एउटा पीसीआर मेसिन जडान गर्न निर्देशन दिएको बताइएको छ ।

समितिले पीसीआर र भेन्टिेलेटर प्रक्रिया तत्काल सुरु गर्न समेत निर्देशन दिएको छ ।