पीसीआर मेसिन जडान नै हुन सकेन प्रदेश–२ मा

जनकपुरधाम– अन्य प्रदेशहरुमा कोरोना जाँच सुरु भइसकेपनि प्रदेश २ मा अझै सुरु हुनसकेको छैन । पीसीआर मेसिन जडान हुन नसक्दा प्रदेश २ मा कोरोना जाँच सुरु हुन नसकेको हो ।

प्रदेश २ को जनकपुरस्थित प्रादेशिक अस्पतालको लागि संघीय सरकारले एकथान पीसीआर मेसिन पठाएको छ । पीसीआर मेसिन काठमाण्डौंबाट मंगलबार साँझै जनकपुर आइपुगेपनि जडान हुन सकेको छैन । मेसिन जडान गर्न काठमाण्डौंबाट तीनजना प्राविधिक जनकपुर आएको बताइएको छ ।

कोरोना जाँच गर्न प्रादेशिक अस्पतालको ओपीडी भवनको तेस्रो तल्लामा पीसीआर मेसिन जडान गरिने छ । बुधबार अपरान्हबाट पीसीआर जडान कार्य सुरु भएको बताइएको छ ।

प्रादेशिक अस्पताल जनकपुरका प्रमुख डा.नागेन्द्र यादवले काठमाण्डौंबाट आएका प्राविधिकहरुले पीसीआर मेसिन इन्स्टल गर्ने क्रममा रहेको बताए । मेसिन जडान भइसकेपनि तत्काल कोरोना परीक्षण गर्न नसकिने उनको भनाइ छ । प्रादेशिक अस्पतालमा कोरोना जाँच गर्ने दक्ष प्राविधिक नरहेकोले विज्ञबाट तालिमको आवश्यक्ता रहेको उनको भनाइ छ ।

काठमाण्डौंबाट आएका प्राविधिकले प्रादेशिक अस्पतालका ल्याबमा कार्यरत प्राविधिकलाई प्रशिक्षण दिइसकेपछि मात्रकोरोनाजाँच सुरु हुने डा. यादवले बताए । उनले पीसीआर मेसिनसहित संघीय सरकारले पीपीई, ग्लोब्स, मास्कलगायतका सामग्रीहरु प्रादेशिक अस्पतालमा पठाएको जानकारी दिएका छन् ।

३४९ जना क्वारेन्टाइनमा

विभिन्न जिल्ला गरी प्रदेश २ मा हाल ३४९ जना क्वारेन्टाइनमा रहेको प्रदेश स्वास्थ्य निर्देशनालयले जनाएको छ । निर्देशनालयका प्रवक्ता वरिष्ठ स्वास्थ्य अधिकृत विजय झाले प्रदेशभित्र रहेको ८६ क्वारेन्टाइनमा ३४९ जना र १९ जना शंकास्पद आइसोलेनमा रहेको जानकारी दिए ।

जनकपुरस्थित प्रादेशिक अस्पतालमा ५, रौतहटमा ३, बारामा ८ र पर्सामा ३ जना ६ जना शंकास्पदको स्वाब परीक्षणको लागि काठमाण्डौंस्थित टेकु प्रयोगशाला पठाइएपनि सबैमा निगेटिभ देखिएको उनले बताए । झाका अनुसार प्रदेश २ मा हालसम्म कुनै शंकास्पदमा कोरोना पोजिटिभ देखिएको छैन् ।

र्देशनालयका अनुसार प्रदेश २ मा सबैभन्दा बढी सप्तरीमा १४७, सिरहामा ३४, धनुषामा २८, सर्लाहीमा ५७, रौतहटमा ६९ र बारामा १४ जना क्वारेन्टाइनमा रहेका छन् । महोत्तरी र पर्सामा भने कोहीपनि क्वारेन्टाइनमा नरहेको निर्देशनालयले जनाएको छ ।