‘र्‍यापिड टेस्ट किट प्रयोगअघि गुणस्तर निर्क्याेल हुनेछ’ 

काठमाडौं– सरकारले चीनबाट खरिद गरेको र्‍यापिड टेस्ट किटको प्रयोगअघि गुणस्तर निर्क्याेल गरिने जनाएको छ।

कोरोना भाइरस (कोभिड–१९)को संक्रमण परीक्षण गर्न प्रयोग गरिने किटको गुणस्तरियताबारे जनगुनासो आएपछि स्वास्थ्य तथा जनसंख्या मन्त्रालयले बुधबार प्रेस विज्ञप्तिमार्फत् यस्तो बताएको हो।

“सरकारले खरिद गरेको किटको गुणस्तर जाँच्न नेपाल स्वास्थ्य अनुसन्धान परिषद्लाई अनुरोध गरिसकिएको र परिषद्ले प्रयोग गर्न योग्य भनी सिफारिस गरेपछि र सम्बन्धित निकायबाट प्रमाणित भइसकेपछि मात्र प्रयोगको लागि वितरण हुने हो,” मन्त्रालयका विज्ञ सल्लाहकार डा. खेमबहादुर कार्कीद्वारा हस्ताक्षरित विज्ञप्तिमा उल्लेख छ।

विज्ञप्तिमा चीनबाट खरिद गरी ल्याइएका र्‍यापिड टेस्ट किट चीन सरकारले प्रमाणित गरेको जनाइएको छ।

यस्तै, मन्त्रालयले विभिन्न सञ्चारमाध्यममा र्‍यापिड टेस्ट किट खरिदबारे भ्रमपूर्ण समाचार सार्वजनिक भएको भन्दै यसबारे आफ्नो ध्यानाकर्षण भएको जनाएको छ।

कोरोना भाइरससँग सम्बन्धित समाचार पुष्टि गरेर मात्रै प्रकाशन तथा प्रशारण गर्नसमेत अनुरोध गरेको छ।