वीरमा मृत्यु भएका एकजनाको कोरोना रिपोर्ट नेगेटिभ, एकको आउन बाँकी

काठमाडौं– कोरोना भाइरस संक्रमणको आशंकामा वीर अस्पतालमा मृत्यु भएका दुई जनामध्ये एकजनाको रिपोर्ट नेगेटिभ आएको छ।

दुईमध्ये एकजनाको रिपोर्ट नेगेटिभ आएको र एकजनाको रिपोर्ट आउन बाँकी रहेको वीर अस्पतालका कोरोना सम्बन्धी फोकल पर्सन डा. विधाननिधि पौडेलले जानकारी दिए ।

आईसीयूमा राखेर उपचार गरिएका बिरामीको रिपोर्ट नेगेटिभ आएको हो।

मृत्यु हुनेमा भारतबाट फर्किएका ३५ वर्षीय पुरुष र काठमाडौं नैकापकी ४० वर्षीया महिला छन्। पुरुषको सोमबार र महिलाको आइतबार अस्पतालको आकस्मिक कक्षमा ज्यान गएको थियो।

अस्पतालले पुरुषमा श्वासप्रश्वाससम्बन्धी समसस्या देखिएको जनाएको थियो। दुवैमा कोरोनाको लक्षण देखिएकाले स्वाब परीक्षणका लागि टेकुस्थित राष्ट्रिय जनस्वास्थ्य प्रयोगशाला पठाइएकोमा रिपोर्ट नेगेटिभ आएको प्रयोगशालाले जनाएको छ।

यसअघि कोरोना संक्रमणकै कारण मृत्यु भएको भनिएका बुटवलका एक युवकको पनि रिपोर्ट नेगेटिभ आएको थियो।