प्रदेश २ : आइसोलेसनमा १२ जना, तीन जनाको रिपोर्ट नेगेटिभ

जनकपुरधाम- प्रदेश २ मा कोरोना भाइरस संक्रमणको आशंकामा १२ जनालाई आइसोलेसन वार्डमा भर्ना गरिएको छ। उनीहरुलाई उच्च ज्वरो देखिएपछि आइसोलेसनमा राखिएको हो।

प्रदेश स्वास्थ्य निर्देशनालयका अनुसार दुईजना जनकपुरस्थित प्रादेशिक अस्पताल, पाँचजना वीरगन्जस्थित नारायणी क्षेत्रीय अस्पताल र पाँचजना बाराको कलैयास्थित अस्पतालमा छन्।

कोरोनाको आशंका भएका तीनजनाको रिपोर्ट निगेटिभ आएको निर्देशनालयले जनाएको छ। निर्देशनालयका वरिष्ठ अधिकृत विजय झाले धनुषाका दुई र सप्तरीको एकजनाको रिपोर्ट नेगेटिभ आएको जानकारी दिए।

उनीहरुको र्याल परीक्षणका लागि केही दिनअघि काठमाडौंको टेकु पठाइएको थियो। उनीहरुमा कोरोना संक्रमण नरहेको पुष्टि भएको झाले बताए।

जनकपुरस्थित प्रादेशिक अस्पतालको आइसोलेसन वार्डमा रहेका दुईजना र रौतहटको चन्द्रपुर हस्पिटलमा उपचार गराइरहेको तीनजनाको रिपोर्ट आउन बाँकी रहेको उनले बताए।

प्रदेश २ का विभिन्न क्वारेन्टाइनमा २५९ जना राखिएका छन्। विदेशबाट आएकाहरुलाई क्वारेन्टाइनमा राखिएको वरिष्ठ अधिकृत झाले जानकारी दिए ।

सप्तरीमा सबैभन्दा बढी १३८ जनालाई क्वारेन्टाइनमा राखिएको छ। रौतहटमा ९२ जना क्वारेन्टाइनमा छन्।

सिरहामा १०, धनुषामा १२, सर्लाहीमा २ र बारामा ५ जना क्वारेन्टाइनमा छन्। धनुषाकै विदेह नगरपालिकाले सञ्चालन गरेको क्वारेन्टाइनमा चारजनालाई राखिएको छ।

महोत्तरी र पर्सामा कोही पनि क्वारेन्टाइनमा नरहेको निर्देशनालयले जनाएको छ। यसअघि पर्साको क्वारेन्टाइनमा राखिएका सबै १५ जना फिर्ता भइसकेका छन्।