अवैध लागुऔषधसहित तीन पक्राउ

सुर्खेत– जिल्लामा अवैध लागुऔषधजस्तो देखिने पदार्थसहित तीन पक्राउ परेका छन्।

पक्राउ पर्नेमा जिल्लाको वीरेन्द्रनगर नगरपालिका–९, का २७ वर्षीय शारदा महतारा, २२ वर्षीय विकाश मानन्धर र वीरेन्द्रनगर नगरपालिका–३ बस्ने सुनिल थारू छन्।

महतारालाई अवैध लागुऔषध ब्राउनसुगर जस्तो देखिने पदार्थ १७ ग्राम १ सय मिलि ग्राम, नगद १ लाख १२ हजार ९ सय ४५ रूपैयाँ र डिजिटल तराजु १ थानसहित पक्राउ गरिएको प्रहरीले जनाएको छ।

लागुऔषध कारोबार भइरहेको सूचनाको आधारमा जिल्ला प्रहरी कार्यालय सुर्खेतबाट खटिएको प्रहरी टोलीले पसलमा बसिरहेकी महताराबाट उक्त परिमाणको लागूऔषध तथा नगदसहित फेला पारेको प्रहरीको भनाइ छ।

प्रहरीका अनुसार घटनाको अनुसन्धानका क्रममा मानन्धर र थारूलाई पनि पक्राउ गरिएको छ। उनीहरूको साथबाट अवैध लागुऔषध ब्राउनसुगर जस्तो देखिने पदार्थ १ सय २० मिलिग्राम बरामद गरिएको प्रहरीले जनाएको छ।

घटनाबारे प्रहरीले थप अनुसन्धान गरिरहेको छ।