अस्पतालले उपचार गर्न नमान्दा बिरामीको ज्यान गयो

काठमाडौं-  कोरोना संक्रमणको आशंकामा अस्पतालले उपचार गर्न नमान्दा बिरामीकाे मृत्यु भएकाे छ। वीरगन्जका नेसनल, गण्डक र वीरगन्ज हेल्थ केयर अस्पतालले उपचार गर्न नमान्दा  बाराको कलैया उपमहानगरपालिका–२२ का २५ वर्षीय विजय कुशवाहको निधन भएकाे हाे।

कुशवहाकाे आइतबार राति त्रिवि शिक्षण अस्पताल पुग्ने बित्तिकै निधन भएकाे थियाे। त्रिवि शिक्षण अस्पतालका कार्यकारी निर्देशक डा. प्रेमकृष्ण खड्गाका अनुसार कुशवाहको अस्पताल ल्याउँदा मृत्यु भइसकेको थियो।‘राति करिब १ बजेतिर अस्पताल ल्याएको रहेछ’ खड्गाले भने, ‘शव हेर्दा अस्पताल ल्याइपुर्‍याउनुभन्दा दुई घण्टा पहिल्यै मृत्यु भइसकेको देखिन्छ।’

थ्रेसरमा मुसुरो कुट्ने क्रममा शुक्रबार खुट्टामा चोट लागेका कुशवाहको नेसनल मेडिकल कलेजले कोरोना संक्रमितको आशंकामा उपचार नगरिदिएकाले ज्यान गुमाउनुपरेको आफन्त महेश कुशवाहले बताए।

खुट्टामा घाउ भएपछि स्थानीय मेडिकलमा टाँका लगाइएको थियो। भोलिपल्टदेखि ज्वरो आउन थालेपछि नेसनल अस्पताल लगिएको महेशले बताए।

उनका अनुसार त्यहाँ चिकित्सकले उपचार गर्न नमानेपछि कुशवाहलाई नारायणी अस्पताल लगिएको थियो।

नारायणीका चिकित्सकले ‘सेप्टी सेमिया’ का कारण बिरामीको खुट्टाको घाउ र छातीमा संक्रमण देखिएकाले सुविधा सम्पन्न अस्पतालमा लैजान भनेपछि राति नै वीरगन्ज हेल्थ केयर र गण्डक अस्पताल पुर्‍याइए पनि दुवै अस्पतालले उपचार गर्न नमानेको महेशले बताए।