प्रदेश सरकारलाई सिद्धार्थ बैंकको १० लाख सहयोग

जनकपुरधाम– सिद्धार्थ बैंकले प्रदेश २ सरकारलाई १० लाख रुपैयाँ सहयोग गरेको छ । कोरोना रोकथाम तथा प्रभावितलाई राहत उपलब्ध गराउन प्रदेश सरकारले स्थापना गरेको राहत कोषमा सिद्धार्थ बैंकले १० लाख रुपैयाँ सहयोग गरेको हो ।

सिद्धार्थ बैंकको जनकपुरस्थित प्रतिनिधिहरुले आइतबार मुख्यमन्त्री लालबाबु राउतलाई १० लाख रुपैयाँ बराबरको चेक हस्तान्तरण गरेका छन् । यसैगरी भाटभटेनी सुपर मार्केटका अध्यक्ष मीनबहादुर गुरुङले राहत कोषमा २५ लाख रुपैयाँ सहयोग गर्ने आश्वासन दिएको प्रदेश सरकारले जनाएको छ ।

प्रदेश सरकारले कोरोना प्रभावितलाई राहत उपलब्ध गराउन २५ करोड रकम राखेर राहत कोष स्थापना गरेको छ । कोषमा प्रदेश सरकारका मन्त्रीहरुले एक महिनाको तलब सहयोग गरेका छन् । यसैगरी नेपाली कांग्रेस संसदीय दलले प्रत्येक प्रदेश सांसदले १० दिनको तलब सहयोग गर्ने निर्णय गरिसकेको छ ।

प्रदेश सरकारले राहत कोषमा सहयोग गर्न प्रदेशस्थित व्यापारिक घरना, सामाजिक संघसंस्था तथा इच्छुक व्यक्तिहरुलाई आग्रह गरेको छ ।