धार्मिकस्थलमा पनि २५ जनाभन्दा बढी भेला हुन नपाइने, लाइन बस्दा कम्तिमा एक मिटर दूरी अनिवार्य

काठमाडौं– सरकारले मठमन्दिर, गुम्बा, मस्जिद, चर्च जस्ता धार्मिक स्थलमा एक पटकमा २५ जनाभन्दा बढी तीर्थालु÷दर्शनार्थी भेला हुन नपाइने जनाएको छ।

कोभिड–१९ संक्रमण रोकथाम तथा नियन्त्रण उच्चस्तरीय समन्वय समितिको आजको बैठकले धार्मिक स्थलमा लामबद्ध हुने व्यक्तिबीचको दूरी कम्तीमा एक मिटर हुनुपर्ने निर्णय गरेको हो ।

त्यस्तै, धार्मिकस्थल जाँदा साबुन पानीले हात धुने र मास्क अनिवार्य लगाउन आग्रह गरेको छ।

बैठकले संस्कृति पर्यटन तथा नागरिक उडड्यन मन्त्रालय अन्तर्गतका सबै साँस्कृतिक केन्द्र, संग्रहालय तथा अभिलेखालय चैत्र मसान्तसम्म बन्द गर्ने निर्णय गरेको छ।

साँस्कृतिक संस्थान, प्रज्ञा प्रतिष्ठानलगायत सभाहलमा पनि यो महिनाभर कुनै कार्यक्रम गर्न पाइने छैन।

मन्त्रालय र अन्तर्गतका निकायले कार्यालय भवन र परिसर नियमित रुपमा सरसफाई गर्ने, कार्यालय प्रवेशद्वारमा अनिवार्यमा ज्वरो मापन गर्ने उपकरण एवं स्यानिटाइजरको व्यवस्था गर्नुपर्ने छ।