डडेल्धुरामा पासोमा पारेर गाईको हत्या

डडेल्धुरा– डडेल्धुराको देउपाल सामुदायिक वनमा पासोमा झुन्ड्याएर हत्या गरिएको अवस्थामा ५ वटा गाईको शव र कंकाल भेटिएको छ।

गन्यापधुरा गाउँपालिका–१ को सामुदायिक वनमा ग्याबिन तारले पासोमा झुन्ड्याएर मारिएको अवस्थामा ५ वटा गाईका शव भेटिएको प्रहरीले जनाएको छ।

सामुदायिक वनको भिरालो क्षेत्रमा झुन्ड्याएर मारिएको अवस्थामा गाईका शव भेटिएको डडेलधुराका प्रहरी प्रमुख डीएसपी दधिराम न्यौपानेले जानकारी दिए।

स्थानीयले गाईको शव देखेपछि प्रहरीलाई खबर गरेपछि डीएसपीसहितको टोली घटनास्थल पुगेको छ। जिउँदै गाईलाई तारले रुखमा बाँधेर हत्या गरेको हुन सक्ने आशंका प्रहरीको छ।

गाईको शवको पशु चिकित्सकको टोलीले अनुसन्धान गरिरहेको छ। पशु चिकित्सकले करिब एक साताअघि गाईको हत्या गरिएको हुन सक्ने बताएका छन्।

प्रहरीले गाई हत्यामा संलग्नको खोजी कार्य जारी राखेको र भेटिएमा गौहत्यासम्बन्धी कानुनअनुसार कारबाही गर्ने डीएसपी न्यौपानेले बताए।