कोरोनाबाट एकै दिनमा १६ हजार संक्रमित, ८२३ को मृत्यु

काठमाडौं- विश्वव्यापी महामारीको रुपमा फैलिएको कोरोना भाइरसबाट बितेको २४ घण्टामा करिब १६ हजार ब्यक्ति संक्रमित भएका छन् ।

वर्डओमिटरका अनुसार बुधबार बिहानसम्ममा १६५ देशमा कोरोना भाइरस फैलिएको छ भने १ लाख ९८ हजार ४१२ जनामा संक्रमण देखिएको छ। कोरोनाबाट अहिलेसम्म ७ हजार ९८४ जनाको मृत्यु भएको छ ।

बितेको २४ घण्टामा मात्रै १५ हजार ९२२ व्यक्ति कोरोनाबाट संक्रमित भएका छन् भने ८२३ जनाले ज्यान गुमाएका छन् । ज्यान गुमाने र नयाँ संक्रमित थपिनेमा सबैभन्दा अगाडी युरोप देखिएको छ ।

युरोपका सात देश इटाली, स्पेन, फ्रान्स, जर्मनी, बेलायत, स्विजरल्याण्ड र नेदरल्याण्डमा मात्रै बितेको २४ घण्टामा ६१५ जनाको मृत्यु भएको छ भने यी देशमा मंगलबार मात्रै ९ हजार ६९० जना नयाँ संक्रमित थपिएका छन् ।

इटालीमा बितेको २४ घण्टामा ३ हजार ५२६ नयाँ संक्रमित थपिदा ३४५ जनाको मृत्यु भएको छ । यहाँ अहिलेसम्म ३१ हजार ५०६ जना संक्रमित भएका छन् भने २ हजार ५०३ जनाको मृत्यु भएको छ ।

यस्तै स्पेनमा मंगलबार मात्रै १ हजार ८८४ जना नयाँ संक्रमित थपिदा १९१ जनाको मृत्यु भएको छ । यहाँ अहिलेसम्म ११ हजार ८२६ जना संक्रमित भएका छन् भने ५३३ जनाको मृत्यु भएको छ ।

जर्मनीमा बितेको २४ घण्टामा २ हजार ९५ नयाँ संक्रमित थपिदा ९ जनाको मृत्यु भएको छ । यहाँ अहिलेसम्म कोरोनाबाट ९ हजार ३६७ जना संक्रमित भएका छन् भने २६ जनाको मृत्यु भएको छ ।

फ्रान्समा पछिल्लो २४ घण्टामा १ हजार ९७ जना संक्रमित भएका छन् भने २७ जनाको मृत्यु भएको छ । यहाँ अहिलेसम्म ७ हजार ७३० जना संक्रमित भएका छन् भने १७५ जनाको मृत्यु भएको छ ।

स्विजरल्याण्डमा मंगलबार मात्रै ३८९ नयाँ संक्रमित थपिए भने २७ जनाको मृत्यु भएको छ । यस्तै बेलायतमा बितेको २४ घण्टामा ४०७ जना नयाँ संक्रमित फेला परेका छन् भने ७१ जनाको मृत्यु भएको छ ।

नेदरल्याण्डमा मंगलबार मात्रै २९२ जना नयाँ संक्रमित थपिएका छन् भने १९ जनाको मृत्यु भएको छ ।

युरोपका यी देशबाहेक अमेरिका र इरानमा पनि तिब्र गतिमा कोरोना फैलिएको छ ।

अमेरिकामा बितेको २४ घण्टामा १ हजार ८३६ जना नयाँ संक्रमित फेला परेका छन् भने २६ जनाको मृत्यु भएको छ । यहाँ अहिलेसम्म ६ हजार ४९९ जना संक्रमित भएका छन् भने ११२ जनाले कोरोनाबाट ज्यान गुमाएका छन् ।

यस्तै इरानमा मंगलबार मात्रै १ हजार १७८ जना नयाँ संक्रमित फेला परेका छन् भने १३५ जनाले कोरोनाबाट ज्यान गुमाएका छन् । यहाँ अहिलेसम्म १६ हजार १६९ जना संक्रमित भएका छन् भने ९८८ जनो ज्यान गुमाएका छन् ।

कोरोना उत्पती भएको देश चीनमा भने यसको नयाँ संक्रमण दर र मृत्युदर घटेको छ ।

बितेको २४ घण्टामा चीनमा १३ जना नयाँ संक्रमित फेला परेका छन् भने ११ जनाको मृत्यु भएको छ । अहिलेसम्म चीनमा ८० हजार ८९४ जना संक्रमित भएका छन् भने ३ हजार २३७ जनाले ज्यान गुमाएका छन् ।