कोरोना नियन्त्रणमा खट्ने कर्मचारीलाई ७५ प्रतिशतसम्म जोखिम भत्ता

सरकारले कोरोना भाइरस (कोभिड–१९) नियन्त्रणका लागि खटिने कर्मचारीलाई २५ देखि ७५ प्रतिशतसम्म जोखिम भत्ता दिने भएको छ। उपप्रधान तथा रक्षामन्त्री ईश्वर पोखरेल संयोजक रहेको उच्चस्तरीय समितिको बैठकले सो निर्णय गरेको हो।

कोरोना नियन्त्रणमा खट्ने चिकित्सक, स्वास्थ्यकर्मी तथा नर्सिङ कर्मचारीलाई ७५ प्रतिशत, उनीहरुको सहयोगमा खट्ने कर्मचारीलाई ५० प्रतिशत र सहयोगीलाई सहयोग गर्न खटिने जनशक्तिलाई सुरुको तलबको २५ प्रतिशत थप भत्ता दिने निर्णय भएको हो ।

त्यसैगरी कोभिड नियन्त्रणसँग सम्बन्धित कार्यमा खटिने अन्य निजामती, सुरक्षाकर्मी र नागरिक उड्ययनका कर्मचारीलाई पनि ५० प्रतिशत जोखिम भत्ता उपलब्ध गराइनेछ।

बैठकले उपत्यकाका ६ वटा ठूला अस्पताल (टेकु अस्पताल, आयुर्वेद अस्पताल कीर्तिपुर, नेपाली सेनाको अस्पताल, सशस्त्र प्रहरीको अस्पताल, वीर अस्पताल र पाटन अस्पताल)मा २०–२० वेडको आईसीयू तयार गर्ने समेत निर्णय गरेको छ ।

त्यसैगरी, प्रदेशका विभिन्न अस्पतालमा ११५ बटा आईसीयु वेडको व्यवस्था गर्ने तयारी सरकारको छ। साथै नेपाल–भारतमा सञ्चालन भएका सार्वजनिक यातायातहरु तत्कालको लागि बन्द गर्ने निर्णय पनि बैठकले गरेको छ ।