दाजुको मिर्गौला दानले बाँचे भरतपुरका किसन मगर

चितवन– भरतपुर–२ चितवनका एक युवकले दाजुको मिर्गौलाले जीवन दान पाएका छन्। दुवै मिर्गौला फेल भएर भौंतारिरहेका क्षेत्रपुरका किसन मगरलाई उनका दाजु चन्द्रबहादुर रिञ्जालीले मिर्गौला दिएका हुन् ।

चार वर्षअघि किसनको मिर्गौलामा समस्या पत्ता लागेको थियो । बिग्रेको मिर्गौला जोगाउन गरिएका प्रयासहरु असफल भएपछि उनी जीवन र मरणको दोसाँधमा पुगिसकेका थिए । यही बेला दाजु चन्द्रबहादुर भाइलाई मृत्युको मुखबाट फिर्ता ल्याउन अग्रसर भएका हुन् । चन्द्रबहादुरको मिर्गौला किसनलाई ‘फिट’ भएको छ।

प्रचलित कानुन अनुसार नातागोता बाहेकका मान्छेले चाहेर पनि मिर्गौला दान गर्न नपाउने अवस्थामा दाजुको मिर्गौला ‘फिट’ भएपछि किसनमा बाँच्ने आश पलायो । चितवनको पुरानो मेडिकल कलेजमा उनको मिर्गौला प्रत्यारोपण भएको छ। ‘पहिले त बाँच्ने आसै मारिसकेको थिएँ, अहिले भने दिने मान्छे घरमा छ भने मिर्गौला प्रत्यारोपण ठूलो समस्या होइन रहेछ भन्ने लाग्यो,’ उनले भने ।

उक्त मेडिकल कलेजका प्राध्यापक डा. राकेश बर्माको नेतृत्वमा १० जनाको टोलीले किसनको मिर्गौला प्रत्यारोपण गरेको थियो । प्रत्यारोपणपछि त्यहाँका डाक्टर र नर्सको राम्रो हेरचाहका कारण आफू चाँडै ठीक भएको किसनले सुनाए ।

भाइलाई मिर्गौला दान गरेका चन्द्रबहादुर अहिले आफू र भाइ दुवैजना तन्दुरुस्त रहेको बताउँछन् । ‘अहिले म पनि राम्रो छु, र भाइ पनि राम्रो छ,’ चन्द्रबहादुरले भने । उक्त अस्पतालले हालसम्म चारवटा सफल मिर्गौला प्रत्यारोपण गरेको प्रा.डा. बर्माले जानकारी दिए।