प्रधानमन्त्री ओलीलाई हिँडडुल गराउन थालियो

काठमाडौं- प्रधानमन्त्री केपी शर्मा ओलीको स्वास्थ्यमा राम्रो सुधार भइरहेको अस्पतालले जनाएको छ।

त्रिवि शिक्षण अस्पताल महाराजगंजमा मिर्गौला प्रत्यारोपणपछि आराम गरिरहेका ओलीको स्वास्थ्य अवस्थामा राम्रो सुधार भइरहेको अस्पतालले पत्रकार सम्मेलन गरी जानकारी दिएको हो।

अस्पतालका कार्यकारी निर्देशक प्रा.डा.प्रेम कृष्ण खड्गाका अनुसार प्रधानमन्त्री ओलीलाई सामान्य हिँडडुल गराउनुका साथै फिजियोथेरापीलाई निरन्तरता दिइएको छ।

साथै उनका भाइटल र ल्याब सूचकांकहरु सामान्य अवस्थामा रहेका छन्।

प्रधानमन्त्री ओलीको गत बुधबार दोस्रो पटक मिर्गौला प्रत्यारोपण गरिएको थियो।

त्यस्तै प्रधानमन्त्री ओलीलाई मिर्गौला दान गरेकी समीक्षा संग्रौलाको स्वास्थ्य अवस्थामा पनि राम्रो सुधार भइरहेको अस्पतालले जनाएको छ।

समीक्षाको पनि भाईटल तथा ल्याब सूचकहरु सामान्य अवस्थामा रहेको कार्यकारी निर्देशक खड्गाले बताए।

अस्पतालका अनुसार ओलीलाई आगामी सोमबारसम्म अस्पतालबाट डिस्चार्ज गर्ने तयारी छ। यद्यपि डिस्चार्जपछि पनि उनी बैठक तथा सभाहरुमा सहभागी हुनेछैनन्।

आईसियुमा रहेका ओलीलाई अहिलेसम्म उपचारमा संलग्न टोलीबाहेक कसैलाई भेट्न दिइएको छैन।