दुर्गा कार्कीको ‘कुमारी प्रश्नहरु’ नेपालयबाट आउँदै

काठमाडौँ । पब्लिकेसन नेपालयको नयाँ टीमले २०२० को ताजा कार्यतालिका अनुसार चारवटा पुस्तकहरू प्रकाशन गर्ने तयारी पूरा गरेको छ ।

नेपालयको महिला नेतृत्व अन्तर्गत प्रकाशित हुन लागेका चारवटै शीर्षकहरू महिला लेखकहरूले सृजना गरेका छन् । नेपालयले आफ्नो यो शृङ्खला, नेपाली साहित्यमा महिला लेखकको प्रतिनिधित्वलाई समर्पित गरेको छ । २०२० मा प्रकाशित हुने कृतिमा सृजनशील युवा लेखकले सृजना गरेका कथा, उपन्यासका साथै संस्मरण विधा र एक स्थापित लेखकको ओजपूर्ण पुनरागमन पनि समावेश छ ।

२०२० को लागि तयार पारिएको यस शृङ्खलाको पहिलो पुस्तक दुर्गा कार्कीको प्रथम कृति ‘कुमारी प्रश्नहरू’ रहेको छ । ‘कुमारी प्रश्नहरू’ सामाजिक यथार्थवादको कोणबाट लेखिएका १३ वटा कथाहरूको संग्रह हो । ‘कुमारी प्रश्नहरू’ उनको प्रथम पुस्तक कृति हो ।

यही फागुन ९ गते सार्वजनिक हुने दुर्गा कार्कीको पुस्तक ‘कुमारी प्रश्नहरू’ को मूल्य ४२५ रुपैयाँ निर्धारण गरिएको छ। पुस्तक नेपालका सबै प्रतिनिधि बिक्रेता र तिनका बिक्री कक्षमा तथा एमाजन डट कममार्फत् संसारभर उपलब्ध हुने नेपालयले जनाएको छ ।