नेपालमा अमेरिकी दबदबा, तिब्बतीलाई ट्राभल डकुमेन्ट दिन दबाब

काठमाडौं– राजधानीबाट प्रकाशित आइतबारका राष्ट्रिय दैनिक अखबारहरुले सरकारले चीनको हुबेइ सहरबाट नेपाली फिर्ता ल्याउन लागेको र सत्तारुढ नेकपामा नेतृत्व र सरकारको चर्को आलोचना भएको विषयलाई मुख्य समाचार बनाएका छन् ।

आजको कान्तिपुर दैनिकले चीनबाट फर्काउन लागिएका नेपालीलाई राख्न उपयुक्त ठाउँको खोजी भइरहेको विषयलाई प्राथमिकताका साथ छापेको छ भने नेपालमा अस्वभाविक रुपमा अमेरिकाले दबाब दिन सुरु गरेको विषयलाई भने मुख्य समाचार बनाएको छ ।

अमेरिकी दुतावासले तिब्बतीलाई ट्राभल डकुमेन्ट दिन दबाब दिएको कान्तिपुरले खुलासा गरेको छ । समाचारमा लेखिएको छ– नेपालस्थित अमेरिकी दूतावासले काठमाडौंमा रहेका केही तिब्बती शरणार्थीलाई यात्रा अनुमतिपत्र (ट्राभल डकुमेन्ट) बनाइदिन परराष्ट्र र गृह मन्त्रालयलाई दबाब दिएको छ ।

दूतावासले परराष्ट्र हुँदै गृह मन्त्रालयलाई पत्र पठाएर र गृहका अधिकारीलाई पटक–पटक भेटेरै ६ जना शरणार्थीलाई अमेरिका लैजानका लागि कागजात बनाइदिन दबाब दिएको हो । दूतावासले गत अगस्टको सुरुमै १९ वर्षीया छेतेन छोजोमसहितका नाममा अनुमतिपत्र जारी गरिदिन परराष्ट्रमार्फत गृहलाई पत्र पठाएको थियो ।

गृह मन्त्रालयस्थित उच्च स्रोतका अनुसार दूतावासको पत्रमा नाम उल्लेख गरिएकाको राष्ट्रियता ‘तिब्बतियन’ उल्लेख छ । गृहले दूतावासको मागअनुसार तिब्बती शरणार्थीका नाममा अनुमतिपत्र दिन इन्कार गरेको छ । गृहले नमानेपछि अमेरिकी दूतावासका कन्सुलर माइकल ई. म्युसीले गृहका अधिकारीसँग भेटेर यात्रा अनुमतिपत्र जारी गरिदिन दबाब दिएको समाचारमा कान्तिपुरले लेखेको छ ।

नागरिक दैनिकले सरकार र पार्टी नेतृत्वको कडा आलोचना शीर्षकमा मुख्य समाचार छापेको छ भने सरकारले चीनबाट नेपाली फर्काउने तयारी गरेको विषयलाई प्राथमिकताका साथ छापेको छ ।

अन्नपूर्ण पोष्ट्ले चीनबाट फर्काइँदै नेपाली शीर्षकमा मुख्य समाचार छापेको छ भने नेकपाको बैठकमा सरकारको चर्को आलोचना भएको विषयलाई प्राथमिकताका साथ प्रकाशित गरेको छ ।

यस्तै राष्ट्र बैंकले सामाजिक सञ्जालको विज्ञापन मार्फत हुने भुक्तानीमा कडा नियन्त्रण गरेको विषयलाई पनि महत्वका साथ छापेको छ । यो नियमले युटुवमार्फत पैसा कमाउनेहरु सबैभन्दा बढि प्रभावित हुनेछन् ।

आजको नयाँ पत्रिकाले चीनको बुहानबाट नेपालीलाई यसरी फर्काइँदैछ शीर्षकमा ब्यानर न्यूज छापेको छ । हुबेईका चार सहरबाट नेपालीलाई वुहानसम्म बसमा ल्याउने र त्यहाँबाट नेपाल एयरलाइन्सको विशेष विमानमा स्वदेश ल्याउने नेपाल सरकारको तयारी छ ।

११ विश्वविद्यालयका १८८ नेपाली विद्यार्थी दूतावासको सम्पर्कमा रहेको र स्वदेश जान इच्छुक छौँ भनेर फारम भरेकालाई फिर्ता लाने तयारी भएको नेपाली दूतावासले जनाएको छ ।