नेकपाको महाधिवेशन ०७७ चैत्रमा

काठमाडौं- सत्तारुढ नेपाल कम्युनिष्ट पार्टी (नेकपा)को महाधिवेशन २०७७ चैत्रमा गर्न प्रस्ताव गरिएको छ। अध्यक्षद्वय केपी शर्मा ओली र पुष्पकमल दाहालले ०७७ चैत्र २५ गतेदेखि ३० गतेसम्म महाधिवेशन गर्ने प्रस्ताव केन्द्रीय समिति बैठकमा पेस गरेका हुन्।

प्रस्तावमा राष्ट्रिय महाधिवेशन अघि ०७७ भदौदेखि मंसिरसम्म सबै स्थानीय र प्रदेश तहका अधिवेशन सम्पन्न गर्ने जनाइएको छ। मंसिर २९ देखि पुस ६ गतेसम्म बसेको स्थायी समिति बैठकमा राष्ट्रिय महाधिवेशनको मिति तय गर्न अध्यक्षद्वयलाई जिम्मेवारी दिइएको थियो।

दाहालले प्रस्तुत गरेको उक्त राजनीतिक प्रतिवेदनमा महाधिवेशन अगाडि देशव्यापी अभियान फागुन १ देखि सुरु भएर असार मसान्तमा सम्पन्न गर्ने जनाइएको छ। प्रतिवेदनअनुसार आगामी फागुन १ देखि १५ सम्ममा प्रदेश, जिल्ला र स्थानीय समितिहरूले बैठक बसेर अभियानको कार्ययोजना बनाउनुपर्ने प्रतिवेदनमा उल्लेख छ।

फागुन मसान्तसम्म पार्टी तथा जनवर्गीय संगठनहरू केन्द्र, जिल्ला र स्थानीय तहमा कार्यकर्ता भेला आयोजना गरी अभियानसम्बन्धी अन्य कार्यक्रम सञ्चालन गर्ने, चैत र वैशाखमा केन्द्रीय संगठन विभागको योजना र निर्देशनअनुरुप सदस्यता नवीकरण सम्पन्न गर्नुपर्ने, जेठ मसान्तसम्म घरदैलो, पदयात्रा र टोलभेला तथा सभाको आयोजना गर्नुपर्ने र असार महिनामा स्थानीय तहहरूमा जनसभा गर्नुपर्ने छ।