कोरोनाका कारण आपतकाल घोषणा गर्नु पर्दैनः डब्लुएचओ

काठमाडौं– चीनमा फैलिरहेको नोवेल कोरोना भाइरसलाई लिएर आपतकालीन स्वास्थ्य संकट घोषणा गर्नुपर्ने अवस्था नरहेको विश्व स्वास्थ्य संगठनले जनाएको छ । चीन, जापान, कोरिया, थाइल्याण्ड तथा सिङ्गापुरका प्रतिनिधिहरु सहभागी संगठनको बैठकले यस्तो ठहर गरको हो।

विश्व स्वास्थ्य संगठनको प्रतिवेदनअनुसार नोवल कोरोना भाइरसबाट प्रभावित मध्ये २० प्रतिशत बिरामीको अवस्था गम्भीर छ । बैठकमा डब्लुएचओका महानिर्देशक टेड रोसले भाइरसलाई लिएर अहिले पूरै विश्वमा आपतकाल घोषणा गर्नुपर्ने अवस्था नरहेको बताएका थिए ।

महानिर्देशक रोसले हिजो चीन पुगेर त्यहाँका राष्ट्रपति सी जीनफिङलाई भेटेका थिए । भेटमा टेडरोसले विश्वव्यापी रुपमा यस भाइरसको फैलावट रोक्नु डब्लुएचओको उच्च प्राथमिकता रहेको बताएका थिए ।

डब्लुएचओको तथ्यांकअनुसार चीनमा ४५ सयभन्दा बढी मानिस प्रभावित छन् भने भाइरस अहिले १८ देशमा फैलिएको छ। संगठनले चीन, जापान, सिंगापुर, थाइल्याण्ड र कोरियालगायत मुलुकलाई पनि सतर्कता र सावधानी अपनाउन भनेको छ ।