आजबाट फेरि वर्षा र हिमपात हुने, कहिले खुल्छ मौसम ?

काठमाडाै‌ं- पश्चिमी न्यून चापीय प्रणालीको प्रभावका कारण आज (बुधबार) र भोलि (बिहीबार) देशका अधिकांश ठाउँमा वर्षा हुने भएको छ ।

उच्च पहाडी र हिमाली क्षेत्रमा भारी हिमपातको सम्भावना रहेको मौसम पूर्वानुमान महाशाखाले जनाएको छ ।

मंगलबार राति पनि देशका विभिन्न स्थानमा वर्षा भएको थियो । यो क्रम आज र भोलिसम्मै जारी रहने महाशखाका मौसमविद् गंगा नगरकोटी नेपाल समयलाई जानकारी दिइन् ।

उनका अनुसार अहिले पश्चिमी क्षेत्रमा हल्कादेखि मध्यम खाले वर्षा भइराखेको छ । काठमाडौं उपत्यकामा पनि आज बेलुका र भोलि दिउँसो वर्षा हुनेछ । वर्षा भएपनि काठमाडौं उपत्यका आपसासका डाँडाहरुमा हिमपातको सम्भावना भने न्यून रहेको उनले बताइन् । 

आज मध्य र पूर्वको मौसम दिउँसो एकैछिन खुल्दै बादल लागेर थोरै ठाउँमा पानी पर्ने सम्भावना रहेको मौसमविद् नगरकोटीले जानकारी दिइन् । आज दिउँसोभन्दा राति धेरै ठाउँमा पानी पर्नुका साथै हिमपात पनि हुने उनले बताइन् ।

मंगलबारबाट बद्लिएको मौसम शुक्रबारदेखि भने क्रमश सुधार हुँदै जाने मौसमविद् नगरकोटीले जानकारी दिइन् । शुक्रबार देशका अधिकांश ठाउँमा घाम लाग्न सक्ने मौसम पूर्वानुमान महाशाखाको अनुमान छ ।

यस्ताे हुनेछ आगामी तीन  दिनकाे माैसम

माघ १५ गते (बुधबार)

दिउँसो : देशको पश्चिम तथा मध्य भू-भाग लगायत पूर्वी भेगका पहाडी क्षेत्रमा सामान्य वदली रही पूर्वी तराई भेगमा आंशिक वदली रहने छ ।

पश्चिमी र मध्य भू-भागका धेरै स्थानहरुमा र पूर्वी भेगका केहि स्थानहरुमा हल्का देखि मध्यम वर्षाको संभावना रहेको छ । उच्च पहाडी तथा हिमाली भु-भागमा हल्का देखि मध्यम हिमपातको संभावना रहेको छ। साथै पश्चिमी उच्च पहाडी तथा हिमाली भु-भागका एक/दुई स्थानमा भारी हिमपातको संभावना रहेको छ ।

राति: देशभर सामान्य देखि पुर्ण बदली रहनेछ । पश्चिमी र मध्य भू-भागका अधिकांश स्थानहरु र पूर्वी भु-भागका केही स्थानहरुमा हल्का देखि मध्यम वर्षाको संभावना रहेको छ ।

उच्च पहाडी तथा हिमाली भु-भागमा हल्का देखि मध्यम हिमपातको संभावना रहेको छ। पश्चिमी उच्च पहाडी तथा हिमाली भु-भागका एक वा दुई स्थानमा भारी हिमपातको संभावना रहेको छ ।

माघ १६ गते (बिहीबार)

दिउँसो: देशको उच्च पहाडी र हिमाली भेगमा सामान्य बदली रहनेछ भने बाँकि भू-भागमा आंशिक बदली रहनेछ। पूर्वी र मध्य भू-भागका थोरै स्थानहरु र पश्चिमी भु-भागका १-२ स्थानहरुमा हल्का वर्षाको संभावना रहेको छ। उच्च पहाडी तथा हिमाली भु-भागमा हल्का हिमपातको संभावना रहेको छ।

राति: देशको पूर्वी भागमा आंशिक देखि सामान्य बदली रहनेछ भने बाँकि भू-भागमा आंशिक बदली रहनेछ ।

माघ १७ गते (शुक्रबार)

दिउँसोः देशको पहाडी भेगमा आंशिक बदली रही मध्य र पूर्वी पहाडी भेगका एक-दुई स्थानमा हल्का वर्षाको संभावना रहेको छ भने बांकि भुभागमा सामान्यतया मौसम सफा रहनेछ ।

राति: देशको पहाडी भेगमा आंशिक बदली रही मध्य र पूर्वी पहाडी भेगका एक-दुई स्थानमा हल्का वर्षाको संभावना रहेको छ भने बांकि भुभागमा सामान्यतया मौसम सफा रहनेछ ।