डा. सिके राउतले भने– मधेसका नेता पैसामा बिके

भैरहवा– जनमत पार्टीका अध्यक्ष डा. सिके राउतले मधेसको नाममा राजनीति गर्नेहरू बिक्री भइसकेको बताएका छन्।

भैरहवाकाे हनुमान मन्दिर मैदान परिसरमा पार्टीले आयोजना गरेको सभालाई सम्बोधन गर्दै डा. राउतले भने, “जसले हिजो मधेसका जनतालाई अधिकार दिलाउँछौं, मधेसका लागि खास अधिकार स्थापित गर्छाैं भन्दै मर्नसमेत उक्साए, उनीहरू आज लोभमा फसे।”

संघीयताको लागि मधेसका जनताले सहादत पाएको उल्लेख गर्दै राउतले पछिल्लो समय सहिदको सोचविपरीत काम भएको बताए। उनले भने, “मधेसका जनताले कसैलाई सांसद् बनाउन सहादत प्राप्त गरेका थिएनन्। मधेससँग पहाडको भाग जोडेर प्रान्तीय शासन व्यवस्था बनाउन पनि सहिद भएका होइनन्।”

मधेसको नाममा राजनीति गर्नेले षड्यन्त्र गरेर मधेसलाई ‘मरभूमि’ बनाएको उनकाे आराेप छ। 

नेता राउतले पहाडमा बस्नेहरूले आज पनि मधेस र यहाँका जनतामाथि हमला गरिररहेको आरोप लगाए।

सभामा पार्टीका केन्द्रीय सदस्य भुपेन्द्र यादवले समृद्ध मधेसका लागि लडाइँ जरुरी रहेको बताए।

सभामा बोल्ने अन्य नेताले पनि मधेसका नाममा राजनीति गरेर सांसद र मन्त्री बनेकाहरूलाई यहाँका जनताले गद्दार घोषणा गरेको बताए। मधेसका नाममा राजनीति गर्नेहरूले जनताका लागि सिन्कोसमेत नभाचेको उनीहरूको भनाइ छ।