कांग्रेसको महाधिवेशन कार्यतालिका फेरियो, क्रियाशील सदस्यता छानविन समिति बनाउने

काठमाडौं- नेपाली कांग्रेसले पार्टीको १४ औ महाधिवेशनका लागि कार्यतालिका संशोधन गरेको छ ।

पार्टी कार्यालय सानेपमा बसेको कार्यसमिति बैठकले शीर्ष नेताहरुबीच भएको सहमतिअनुसार महाधिवेशनको कार्यतालिका हेरफेर गरिएको हो ।

२०७७ फागुनमै गर्ने गरी वडा तहदेखि प्रदेश तहसम्मको कार्यतालिका संशोधन गरिएको छ । तल्लो तह वडा तहको अधिवेशन १६ कातिक २०७७ मा हुने भएको छ । यसअघि वडा तहको अधिवेशन २०७७ मंसिर ९ मा तोकिएको थियो ।

त्यसैगरी मंसिर ११ का लागि तोकिएको गाउँ तथा नगरपालिकाको अधिवेशन अब कातिक १८ मा हुने भएको छ ।

तीन सय ३० प्रदेश निर्वाचन क्षेत्रको अधिवेशन कातिक २१ मा गरिने भएको छ । यसअघि प्रदेशको अधिवेशन मंसिर १५ का लागि तय भएको थियो ।

यसैगरी प्रतिनिधिसभा क्षेत्र र एउटा मात्र प्रतिनिधिसभा क्षेत्र भएको जिल्लाको अधिवेशन कातिक २१ २०७७, एकभन्दा बढी प्रतिनिधिसभा निर्वाचन क्षेत्र भएको जिल्लाको अधिवेशन कातिक २३ र सातै प्रदेशको अधिवेशन मंसिर २९ मा हुनेछ । यसअघि प्रदेश अधिवेशन पुस १५ का लागि तोकिएको थियो ।

बैठकले क्रियाशील सदस्यता फागुन र चैत महिनाभित्र वितरण गर्ने निर्णय गरेको छ भने क्रियाशील सदस्यता छानविन समिति बनाउने निर्णय पनि गरेको छ ।

कांग्रेसको १४ औं महाधिवेशन भने २०७७ फागुन ७ गते नै हुने भएको छ ।