स्वास्थ्य मन्त्रालयले कर्मचारी समायोजनको निवेदन दर्ता नगर्ने

काठमाडौं– स्वास्थ्य तथा जनसंख्या मन्त्रालयले अब समायोजनसम्बन्धी कुनै पनि निवेदन दर्ता नगर्ने निर्णय गरेको छ । समायोजनपछि गुनासो लिने काम सकिएको जनाउँदै मन्त्रालयले अब थप निवेदन दर्ता नगर्ने जनाएको हो ।

संघीयता कार्यान्वयनका क्रममा गत चैत र वैशाखमा सरकारले कर्मचारी समायोजन ऐन २०७५ बमोजिम स्वास्थ्य सेवाका कर्मचारीको समायोजन गरेको थियो ।

कर्मचारी समायोजन अव्यवहारिक भएको भन्दै समायोजन पश्चात व्यापक गुनासो तथा असन्तुष्टि देखिएपछि मन्त्रालयले समायोजनबारे गुनासो दर्ता गर्न गत असोजमा आह्वान गरेको थियो । तर गुनासो आउने क्रम नरोकिएपछि एकमुष्ट रुपमा मन्त्रालयले गुनासो लिएको थियो ।

सोमबार मन्त्रालयले जारी गरेको सूचनामा अब समायोजनको गुनासो निवेदन नलिने निर्णयको जानकारी गराएको हो । तर, दरबन्दीभन्दा बढी भई फिर्ता भएका, फाजिलमा रहेका, समायोजन नै नभएका र सामान्य त्रुटि भएकाको हकमा भने गुनासो गर्न सकिने मन्त्रालयको निर्णयमा उल्लेख छ ।

मन्त्रालयले समिति नै गठन गरी समायोजन सच्याउँदा पनि अझै करिब ७ हजार समस्या सम्बोधन गर्न बाँकी रहेको जनाएको छ ।