अग्नि सापकोटाविरुद्धको रिट न्यायाधीश मल्लको बेञ्चमा

काठमाडौं- सभामुख अग्निप्रसाद सापकोटाविरुद्धको रिटको पेसी न्यायाधीश सपना प्रधान मल्लको इजलाशमा तोकिएको छ।

काभ्रेका अर्जुन लामाको हत्याको आरोप लागेका सापकोटाविरुद्ध १० माघमा सर्वोच्चमा दर्ता भएको रिटकोे पेसी हिजो (आइतबार) न्यायाधीश हरि फुयालको इजलाशमा तोकिए पनि ‘हेर्न नमिल्ने’ भएपछि आज पुनः न्यायाधीश सपना प्रधान मल्लको इजलाशमा तोकिएको हो।

मल्लको इजलासको सातौं नम्बरमा उक्त पेसी छ।

फुँयाल सर्वोच्च अदालतकोे न्यायाधीश हुनुअघि सापकोटा विरुद्धकै अर्को मुद्दामा कानुन व्यवसायीको हैसियतले बहस गरेकोले मुद्दा हेर्न नमिल्नेमा परेको थियो।

वरिष्ठ अधिवक्ता दिनेश त्रिपाठीले दायर गरेको रिट निवेदनमा संविधान एवं कानुनको गम्भीर उल्लङ्घन हुने जनाउँदै सभामुखका लागि प्रस्तावित उम्मेदवार सापकोटालाई सभामुखमा निर्वाचित नगर्न माग गरिएको थियो।

त्यस्तै रिटमा सापकोटलाई पक्राउ गरी अनुसन्धान अघि बढाउन, अहिलेसम्म सापकोटाविरुद्धको अनुसन्धान अघि नबढाउने प्रहरीलाई कार्वाही गर्न लगायतका माग गरिएको छ।

प्रतिनिधिसभा बैठकले सापकोटालाई आइबार सर्वसम्मत सभामुख निर्वाचित गरिसकेको छ। काभ्रेका अर्जुन लामा हत्याको आरोपमा मुद्दा खेपिरहेका सापकोटालाई सभामुख बनाइएपछि द्वन्द्वपीडित नागरिक र नागरिक समाजले विरोध गरिरहेका छन्।