एक महिनापछि खुल्यो मार्तडी-कोल्टी सडक

बाजुरा - बाजुरा जिल्लाको मार्तडी-कोल्टी सडक खण्डमा एक महिना अगाडिदेखि परेको हिउँ पन्छाएर सडक सञ्चालन गरिएको छ। बडिमालिका नगरपालिकाको सहयोग र वडा-७ को समन्वयमा एक महिनादेखि परेको हिउँ हटाएर बाटो खुलाइएको हो।

अघिल्लो महिनादेखि परेको भारी हिमपात र वर्षाले मार्तडी-कोल्टी सडकखण्डअन्तर्गत पर्ने पोरखे लेख र आसपासको क्षेत्रमा हिउँ जमेका कारण सडक अवरुद्ध भएको थियो। शुक्रबारदेखि अवरुद्ध सडक खुला गरिएको नगरपालिका-७ का वडाध्यक्ष धर्मराज पाध्यायले बताए।

बाजुरामा परेको लगातारको हिमपातका कारण जनजीवन कष्टकर बन्नुका साथै उत्तरी क्षेत्रका चार स्थानीय तहमा दैनिक उपभोग्य सामानको अभाव भएको छ। वडा नं ७ कार्यालयको समन्वय तथा नगरपालिकाको सहयोगमा डोजर लगाएर हिउँ फालिएको वडाध्यक्ष पाध्यायले बताए। चौथो पटकसम्म परेको हिमपातका कारण मार्तडी-कोल्टी सडकखण्ड एक महिना अगाडिदेखि अवरुद्ध भएको थियो।