शुक्रबारको वार्ताका लागि तयारी गर्दै कांग्रेसकाे असन्तुष्ट समूह

काठमाडौं - नेपाली कांग्रेसभित्रको आन्तरिक विवाद मिलाउन सभापति शेरबहादुर देउवाले बुधबारबाट सक्रियता देखाएपछि आज असन्तुष्ट समूह छलफलमा जुटेका छन्।

भोलि (शुक्रबार) बिहान सभापति देउवा र असन्तुष्ट पक्षबीच 'फाइनल' वार्ता हुने तयारी भएको छ। उक्त छलफलमा कुन–कुन एजेण्डामा कतिसम्म लचक हुने लगायतको विषयमा अहिले महामन्त्री शशांक कोइराला निवास महाराजगंजमा छलफल भइरहेको छ।

छलफलको सुरुमा वरिष्ठ नेता रामचन्द्र पौडेल, कृष्णप्रसाद सिटौला, प्रकाशमान सिंह, रामशरण महत, अर्जुननरसिंह केसीलगायतका नेताहरु सहभागी भएपनि असन्तुष्ट समूहका केन्द्रीय समिति सदस्यहरु पनि थपिदै गएका छन्।

आज साँझसम्म प्याकेजमै सहमति गर्ने गरी छलफल अगाडि बढीरहेको एक केन्द्रीय सदस्यले बताए।

छलफलमा आगामी महाधिवेशनको क्यालेन्डर, विभाग तथा भातृ संस्थाहरुको गठनलगायतका विषय राखिएको छ।

यसअघि बुधबार साँझ देउवाले विवाद समाधानका लागि सहमति खोज्न वरिष्ठ नेता रामचन्द्र पौडेललगायतसँग छलफल गरेका थिए। आज आन्तरिक छलफल गर्ने र शुक्रबार सहमति गर्ने निष्कर्षमा देउवा र पौडेल पुगेका थिए।

भातृ संगठनको विवादमा यसअघि भएको सहमति कार्यान्वयन गर्न असन्तुष्ट पक्षको माग रहेको छ। जसअनुसार नेविसंघमा असन्तुष्ट पक्षको ४० र संस्थापनको ६०, तरुण दलमा असन्तुष्ट पक्षको ३५ र संस्थापनको ६५ प्रतिशत हुनेछ। तर, सिटौला पक्षले ४० प्रतिशत हिस्सा खोजेपछि विवाद बढेको थियो।

पार्टीभित्र विवाद बढेपछि मंसिर २६ बाट सुरु भएको केन्द्रीय समिति बैठक असन्तुष्ट पक्षले बहिस्कार गर्दै आएका छन्।