सापकोटालाई सभामुखको उम्मेदवार बनाइएकोमा कांग्रेसको आपत्ति

काठमाडौं– सत्तारुढ नेपाल कम्युनिष्ट पार्टी (नेकपा) ले सभामुखको उम्मेदवार अग्नि सापकोटालाई बनाएकोमा प्रमुख प्रतिपक्षी दल नेपाली कांग्रेसले आपत्ति जनाएको छ।

नेपाली कांग्रेसका प्रवक्ता विश्वप्रकाश शर्माले समाजिक सञ्जालमार्फत नेकपाप्रति आक्रोस व्यक्त गरेका छन्।

सभामुखको उम्मेदवार प्रकरणमा प्रवक्ता शर्माले लेखेका छन्, ‘राजनीतिमा अनेक पात्र र प्रवृत्ति हुन्छन् । कुन पदमा कस्तो प्रवृत्ति?  छनौट उचित भएन भने त्यो पदको गरिमा त धरापमा पर्छ नै राजनीतिप्रति नै थप वितृष्णा बढ्छ।’

नेकपाले सभामुखको उम्मेदवार गलत चयन गरेको भन्दै शर्माले भनेका छन्,‘श्री पशुपतिनाथले बहुमतधारी नेकपालाई सद्बुद्धि प्रदान गरुन्।’

दल अथवा सरकारको नेतृत्वभन्दा संसदको नेतृत्व राम्रो हुनु पर्ने शर्माको भनाई छ।

‘दल या सरकारको नेतृत्व भन्दा संसदको नेतृत्व फरक गरिमा, सालिनता र सन्तुलनको संस्कारगत छवि समेत अनुभुती हुनुपर्ने जिम्मेवारी हो।’ उनले लेखेका छन्,‘सत्य निरुपणको टेबुलमा थियो त अलग कुरा अन्यथा अदालतमा विचाराधीन मुद्दामा के उन्मुक्ति दिने अधिकार राख्ने थलो हुन् राजनैतिक दल या संसद ?’