अन्नपूर्ण हिमपहिरोमा बेपत्ता भएका ७ जना अझै भेटिएनन्, कोरियाली टोली पनि खोजीमा जुट्यो

पोखरा- माघ ३ गते शुक्रबार हिमपहिरोमा परेर बेपत्ता भएका तीन नेपालीसहित ७ जनाको अवस्था अझै अज्ञात रहेको प्रहरीले जनाएको छ ।

बाक्लो हिउँ र पहिरोसँगै खसेको ढिस्कोका कारण हराएकाहरुको अवस्था पत्ता लगाउन कठिन भएको कास्कीका प्रहरी प्रमुख एसपी दानबहादुर कार्कीले नेपाल समयलाई जानकारी दिए । अझै पनि हिमपात र पहिरो जाने क्रम पूर्णरुपमा नरोकिएकाले खोजीमा समस्या भएको उनले बताए ।

उनका अनुसार खोजीमा परिचालन गरिएको हेलिकोप्टर घटना स्थलमा बस्न बसेको छैन् भने पैदल गएका प्रहरी आइतबार बल्ल पुगेका छन् ।

ठूलो हिउँको ढिस्को झरेको र त्यसलाई पन्छाउन नसकिएका कारण वेपत्ता भएकाहरु त्यहि ढिस्को परे वा अन्त कतै गए भन्ने एकिन हुन नसकेको एसपी कार्कीले बताए । बेपत्ता भएकाहरु सोहि ढिस्कोले पुरिएको हुनसक्ने प्रहरीको आशंका छ ।

यद्यपी खोजीका लागि आज (सोमबार) पनि हेलिकोप्टरसहितको प्रहरी टोली परिचालन गरिएको छ । पैदल गएका प्रहरीले उनीहरुको खोजीलाई तिब्रता दिएको कास्की प्रहरी प्रमुख एसपी कार्कीले जानकारी दिए । 

अन्नपूर्ण बेसक्याम्प नजिकैको पदमार्गमा गत माघ ३ गते बिहान १० बजेको आएकोे हिमपहिरोमा परेर तीन नेपाली र चार कोरियन नागरिक वेपत्ता भएका थिए ।

नेपाली पथप्रदर्शक सरोज परियार, सहयोगी मीनबहादुर लामा (तामाङ) र छिरिङ भोटे तथा कोरियन नागरिक लि मिन सु, जोङ्गपिल बोङ्ग, किम सोक जा र चोइ जो वोन अझै पनि बेपत्ता रहेको पर्यटन विभागले जनाएको छ।

कोरियनका आफन्त रेस्क्यू टिमसहित खोजीका लागि नेपाल आएको प्रहरीले जनाएको छ । उनीहरु आज (सोमबार) घटनास्थलमा गएर खोजी गर्ने भएका छन् ।