राष्ट्रियसभा निर्वाचन : नेकपा-राजपा गठबन्धनलाई संघीय समाजवादीको साथ

काठमाडौं- आगामी राष्ट्रिय सभा निर्वाचनमा नेपाल कम्युनिष्ट पार्टी (नेकपा) र राष्ट्रिय जनता पार्टी (राजपा) नेपालको गठबन्धनलाई नेपाल संघीय समाजवादी पार्टीले समर्थन गरेको छ।

पूर्वगृह राज्यमन्त्री रिजवान अन्सारी अध्यक्ष रहेको उक्त पार्टीको प्रदेश दुई सभामा एक जना सदस्य छन् भने प्रदेश २ मै एकजना नगरपालिका मेयर र एक जना गाउँपालिका अध्यक्ष छन्।

प्रदेश २ को चारवटा सिटमध्ये नेकपा र राजपाबीच दुई–दुई सिट लिने सहमति भएको छ। जसअनुसार नेकपाको तर्फबाट महिला सिटमा तुल्सी कुमारी दाहाल र दलित सिटमा राधेश्याम पासवान उम्मेदवार छन्।

यसैगरी राजपाको भागमा परेको दुई सिटमध्ये अन्य समूह सिटमा मृगेन्द्र सिंह यादव र अल्पसंख्यक सिटमा शेखरसुमन सिंह उम्मेदवार छन्।

समाजवादीले नेकपा र राजपाका नेताहरुसँग दुई बुँदे सहमति गर्दै उम्मेदवारहरुलाई सघाउने निर्णय गरेको छ।

सहमति अनुसार तीनवटै दलबीच आगामी दिनमा राजनीतिक सहकार्य र सहयोग आदान प्रदानसमेत हुनेछ। समाजवादीका अध्यक्ष अन्सारी तत्कालीन एमालेबाट अलग भई अशोक राईको नेतृत्वमा बनेको संघीय समाजवादी पार्टीका उपाध्यक्ष बनेका थिए।

राई नेतृत्वको पार्टी उपेन्द्र यादवसँग एकीकरण भएपछि अन्सारीले आफ्नै नेतृत्वमा नेपाल संघीय समाजवादी पार्टी गठन गरेका हुन्।