प्रदेश २ मा आइतबार सार्वजनिक विदा

जनकपुरधाम- मधेश आन्दोलनका शहिदहरुको सम्झनामा आइतबार प्रदेश २ सरकारले बलिदानी दिवस मनाउने भएको छ।

संघीयता कार्यान्वयनमा आएयता प्रदेश सरकारले माघ ५ गते दोस्रो पटक बलिदानी दिवस मनाउन लागेको हो।

पहिलो मधेश आन्दोलनको क्रममा २०६३ माघ ५ गते सिरहाको लहानमा रमेश महतोको हत्या भएपछि प्रदेश सरकारले बलिदानी दिवस मनाउने गरेको छ।

यसअघि मधेश केन्द्रीत दलहरुले यस दिनलाई बलिदानी दिवसको रुपमा मनाउँदै आइरहेको थियो।

बलिदानी दिवसको अवसरमा प्रदेश सरकारले आइतबार सार्वजनिक विदा दिने निर्णय गरेको छ। गत वर्ष सिरहाको लहानमा बलिदानी दिवस मनाएको प्रदेश सरकारले यस वर्ष वीरगंजमा औपचारिक कार्यक्रमको आयोजना गरेको छ।

वीरगंजमा आयोजना हुने कार्यक्रममा प्रदेश सरकारका मन्त्रीहरु, मधेश केन्द्रीत दल, सहिद परिवारलगायतको सहभागिता रहने जनाइएको छ। बलिदानी दिवसको अवसरमा शहिद परिवारलाई सम्मान गर्ने कार्यक्रमसमेत राखिएको छ।