बौद्धमार्गी नेपाल प्रवेश गर्दा सीमामा दुर्व्यवहार !

काठमाडौं– भारत हुँदै नेपाल आउने बौद्धमार्गीहरुले सीमा क्षेत्रमा दुर्व्यवहार खेप्नु परेको छ।

भारतीय अखबार ‘द हिन्दु’ मा प्रकाशित समाचारमा विभिन्न देशबाट भारत हुँदै लुम्बिनी आउने बौद्धमार्गीहरुले सुनौली नाकामा भारतीय अध्यागमन र भन्सार विभागले दुख दिएको उल्लेख गरेको छ।

सुनौली नाकामा सुरक्षा जाँच कडा पारिएसँगै पर्यटकहरुले ४ देखि ६ घण्टासम्म लाइनमा उभिएर सास्ती खेप्नु परेको ‘द हिन्दु’ ले उल्लेख गरेको छ। ती भारतीय कार्यालयहरुमा अपर्याप्त पूर्वाधारका कारण पनि समस्या भएको हो।

सुनौली उत्तरप्रदेशको शहर गोरखपुरबाट ९० किलोमिटर टाढा छ भने सुनौलीबाट लुम्बिनी २६ किलोमिटरको दुरीमा। समाचारका अनुसार बौद्ध सर्किटमा समावेश बोधगया, राजगिर, बैशाली, सारनाथ, स्रावस्ती, कुसिनगर र लुम्बिनी घुम्नका लागि थाइल्याण्ड, कोरिया, जापान, श्रीलंका, म्यानमारलगायतबाट अउने पर्यटकहरु भारततर्फको चेकजाँचले गर्दा अप्ठ्यारोमा परेका छन्।

सीमा क्षेत्रमा हुने यस्तो दुर्व्यवहारले नेपाल आउने पर्यटक प्रभावित हुने र भिजिट नेपालमा समेत प्रभाव पार्ने त होइन भने चासो पनि थपिएको छ।