योजनाको भुक्तानी नपाएको भन्दै जनकपुरमा प्रदेश सरकारविरुद्ध प्रदर्शन, चार पक्राउ

जनकपुरधाम– योजनाको भुक्तानी नगरेको भन्दै उपभोक्ता संघर्ष समितिले शुक्रबार जनकपुरमा प्रदेश २ सरकारविरुद्ध प्रदर्शन गरेको छ।

गत आर्थिक वर्षमा सम्पन्न योजनाको भुक्तानी नपाएको भन्दै संघर्ष समितिले जिरोमाइलमा प्रदर्शन गरेको हो। पूर्वघोषित कार्यक्रम अनुसार प्रदर्शन गरेको समितिले जनाएको छ।

बक्यौता रकम भुक्तानीका लागि दबाब दिन उपभोक्ता समिति सदस्यहरूले उपभोक्ता संघर्ष समिति गठन गरेका थिए। त्यसयता समितिले विभिन्न दबाबमूलक कार्यक्रम गरिरहेको छ।

यसअघि गत सोमबार समितिले जनकपुरस्थित पूर्वाधार कार्यालयमा तालाबन्दीसमेत गरेको थियो। यस्तै, समितिले प्रदेशसभा घेराउसमेत गरेको थियो।

गत आर्थिक वर्षको अन्त्यमा प्रदेश सरकारका मन्त्री र सांसदले बाँडेका ८४२ योजनामध्ये करिब ८७ करोड रूपैयाँ हालसम्म भुक्तानी हुन नसकेको छैन।

उपभोक्ता समितिका अधिकांश पदाधिकारी प्रदेश सरकारमा सत्तासीन समाजवादी पार्टी र राजपाका कार्यकर्ताहरू छन्। प्रदेश सरकारले भुक्तानी नगरेको भन्दै प्रदेशसभा बैठकसमेत बस्न सकेको छैन।

यता प्रदेश सरकारले भने कानुनी अड्चनका कारण गत आर्थिक वर्षका योजनाको भुक्तानी चालु आर्थिक वर्षमा गर्न नसकेको बताइको छ।

यसैबीच, सरकारविरुद्ध प्रदर्शन गरेको आरोपमा प्रहरीले चार जनालाई पक्राउ गरेको छ। जिल्ला प्रहरी कार्यालय, धनुषाका अनुसार पक्राउ पर्नेमा रोशन सिंह राणा, रोशन ठाकुर, विमलेश चौधरी र शंकर साह छन्।