कार्यालय नआउने कर्मचारीलाई कारबाही गर्ने स्वास्थ्य मन्त्रालयकाे चेतावनी

काठमाडौं- स्वास्थ्य तथा जनसंख्या मन्त्रालयले जानकारी नै नगराई २ महिनाभन्दा बढी समय कार्यालय अनुपस्थित हुने कर्मचारको विवरण माग गरेको छ ।

मन्त्रालयले स्वास्थ्य सेवा विभाग, आयुर्वेद तथा बैकल्पिक चिकित्सा विभाग, सरकारी अस्पताल, प्रतिष्ठान, औषधि व्यवस्था विभाग लगायत आफ्ना मातहातका कर्मचारीलाई पत्र पठाइ कर्मचारीको विवरण माग गरको हो ।

त्यस्ता कर्मचारीको विस्तृत विवरण ७ दिनभित्र उपलब्ध गराउन पत्र काटिएको छ । सो पत्र अनुसार विवरण आईपुग्ने आज अन्तिम दिन हो ।

कार्यालय नियमित नआउने कर्मचारीको विवरण मागेको स्वास्थ्य मन्त्रालयले उनीहरुमाथि कारबाही प्रक्रिया अघि बढाउने तयारी गरेको छ । यस्ता कर्मचारीलाई स्पष्टीकरण पत्र काट्ने र निलम्बनसम्मको प्रक्रिया अघि बढाउने मन्त्रालयको तयारी छ ।

पछिल्लो समय समायोजनको चित्त नबुझेर पदस्थापन भएको कार्यालयमा हाजिर हुन नजाने कर्मचारीको संख्या बढ्दै गएको छ ।

अझैपनि ७ हजार कर्मचारीकाे समायोजनको समस्या सुल्झिएको छैन । कर्मचारी समायोजनमा व्यवहारीक त्रुटी देखिएको स्वास्थ्य तथा जनसंख्या मन्त्री भानुभक्त ढकालले भन्दै आएका छन् र समायोजनको समस्या समाधानमा ध्यान दिएको बताउँदै आएका छन् ।