कृषि बैंकको चार करोड हिनामिना गर्ने आठ जनाविरुद्ध मुद्दा

काठमाडौं- कृषि विकास बैंक न्यूरोड शाखाको ४ करोडभन्दा बढी रकम हिनामिना प्रकरणमा अख्तियार दुरुपयोग अनुसन्धान आयोगले ८ जनाविरुद्ध विशेष अदालतमा मुद्दा दायर गरेको छ।

आयोगले बैंकका तत्कालीन शाखा प्रबन्धक प्रेमहरी ढुंगेल, ऋण शाखा प्रमुख गोपाल गिरी, तत्कालीन ऋण अधिकृत अवकाश प्राप्त सलिल रेग्मी, टेलर सहायक दीपिका रेग्मीविरुद्ध मंगलबार मुद्दा दायर गरेको हो।

यस्तै बैंकको ऋण शाखा प्रमुख महेश्वर मरहट्ठा, तारानाथ पाण्डे, अवकासप्राप्त सहायक रथी रमेशराज विष्ट र दुर्गा ज्वेलरीका संचालक प्रकाश घतानीविरुद्ध पनि मुद्दा दायर भएको छ।

चेक सच्याएर मिलेमतोमा गैरकानुनी रुपमा बैंकबाट ४ करोड २४ लाख १३ हजार ६ सय १५ रुपैयाँ ४५ पैसा झिकेर हिनामिना गरेको आरोप अख्तियारले लगाएको छ।

राष्ट्र बैंकको निर्देशिका विपरीत सबै व्यक्तिको मिलेमतोमा चेक क्लियरिङको काम गरी प्राप्त रकम भागबन्डा गरिएको अख्तियारका प्रवक्ता प्रदीप कुमार कोइरालाले जानकारी दिए।

सो प्रकरणमा बैंककी टेलर दीपिकालगायतलाई अख्तियारको टोलीले मंसिर १७ गते पक्राउ गरेको थियो।