फोहोरबाट उर्जा उत्पादनको लागि युएईले दियो १ अर्बं १४ करोड ऋण

काठमाडौं। संयुक्त अरब इमिरेट्स (यूएई) ले नेपालमा सहरी फोहोरबाट आधुनिक उर्जा उत्पादनका लागि एक करोड अमेरिकी डलर अर्थात् करिब एक अर्ब १४ करोड नेपाली रुपैयाँ बराबरको सहुलियतपूर्ण कर्जा दिने भएको छ ।

युएइको राजधानी अबुधावीमा जारी विश्व नवीकरणीय उर्जा संघ (इरिना) को वार्षिक साधारणसभाको अवसरमा युएईले अबुधावी फण्ड फर डेभलपमेन्ट अन्तर्गत सो रकम नेपाललाई ऋण दिने घोषणा गरेको हो । सो साधारणसभामा भाग लिन नेपालबाट उर्जा, जलश्रोत तथा सिंचाइमन्त्री वर्षमान पुन अबुधावी पुगेका थिए ।

सो कर्जा रकम स्वीकार्दै मन्त्री पुनले उक्त रकमबाट विभिन्न ६९ वटा नगरपालिकामा फोहोरबाट ठूला बायोग्यास आयोजना सञ्चालनका साथै प्रांगारिक मल उत्पादन गरिने जानकारी दिए । सो सहयोगको लागि विभिन्न मुलुकबीच प्रतिस्पर्धा भएको थियो ।

उक्त फण्डबाट नेपालले ठूला बायोग्यास र नगरपालिकास्तरको फोहोरबाट उर्जा उत्पादन गर्ने परियोजनाहरुमा न्यून ब्याजदरमा कर्जा प्रवाह गर्ने सुविधा प्राप्त हुनेछ ।