दुर्गा प्रसाईंले २० करोड घुसको झुटा आरोप लगाएः चिकित्सा शिक्षा आयोग उपाध्यक्ष गिरी

काठमाडौं- चिकित्सा शिक्षा आयोगका उपाध्यक्ष डा श्रीकृष्ण गिरीले बी एण्ड सी मेडिकल कलेजका सञ्चालक दुर्गा प्रसाईले आफूमाथि लगाएको २० करोड घुसको आरोप निराधार रहेको बताएका छन् ।

बुधबार काठमाडौंको सुविधानगरमा पत्रकार सम्मेलन गरी डा गिरीले भने, “त्यसको पुष्ट्याईं गर्न म सम्वद्ध व्यक्तिलाई चुनौती दिन्छु। समाचारमा उल्लेख भएजस्तो म कसैलाई पनि भेट्न द्वारिका होटलमा गएको छैन। यसको कानुनी उपचारको बाटो अवलम्वन गर्ने नै छु।”

झापाको बी एण्ड सी मेडिकल कलेजका सञ्चालक दुर्गा प्रसाईंले कलेजको सम्बन्धन प्रक्रिया अघि बढाउन चिकित्सा आयोगका उपाध्यक्ष श्रीकृष्ण गिरीले आफूसँग २० करोड रुपैयाँ मागेको आरोप लगाएका थिए।

प्रसाईंले बानेश्वरमा पत्रकार सम्मेलन गरी गिरीले आफूलाई द्वारिका होटलमा बोलाएर २० करोड रुपैयाँ मागेको आरोप लगाएका हुन्।

उनका अनुसार बिएण्डसीलाई सम्बन्धन माग्दै निवेदन लिएर मंसिर १५ गते प्रसाईं चिकित्सा शिक्षा आयोगमा पुगेका थिए। तर उनलाई गिरीले साँझ द्वारिका होटलमा बोलाए। प्रसाईंको दाबी अनुसार होटेलमा गिरीले उनीसँग सम्बन्धनका लागि २० करोड रुपैयाँ मागेका थिए।

आफूले सो रकम दिन नसक्ने भनेपछि गिरीले सम्बन्धनको निवेदन नै दर्ता गर्न नमानेको प्रसाईंको दाबी छ।

यता डा गिरीले भने २० करोडको कुरा आफूले समाचारमा पढेपछि आश्चर्यचकित भएको बताए । उनले आफू दशौं वर्षदेखि द्वारिका होटेलमा नगएको बताए ।

उनले भने,  "एक महिना अगाडि आयोगमा दुर्गा प्रसाईं आउनुभएको थियो त्यसबेला डकुमेन्ट नपुगेर फिर्ता गरिएको हो।"