औषधि व्यवस्था विभागको महानिर्देशकमा पुनः ढकाल

काठमाडौं– औषधि व्यवस्था विभागमा महानिर्देशकको जिम्मेवारी पुनः नारायण ढकालले पाएका छन् । स्वास्थ्य तथा जनसंख्यामन्त्री भानुभक्त ढकालको मन्त्रीस्तरीय निर्णयले ढकाललाई पुनः विभागको महानिर्देशकको जिम्मेवारी दिएको औषधि व्यवस्था विभागले जनाएको छ ।

स्वास्थ्य मन्त्रालयले समायोजनमा महानिर्देशकका रुपमा रहेका ११ औं तहका नारायण ढकाललाई विभागभित्र रहेको राष्ट्रिय औषधि प्रयोगशालामा पदस्थापन गरी निमित्त महानिर्देशकको जिम्मा १० औं तहका पान बहादुर क्षेत्रीलाई दिएको थियो । त्यसविरुद्ध ढकाल सर्वोच्च अदालतमा गएका थिए ।

सर्वोच्चले ढकालको पक्षमा आदेश दिएपछि मन्त्रालय निर्णय सच्याउँदै महानिर्देशकको रुपमा पुनःवहाली गरायो तर लगत्तै काजमा मन्त्रालय तानेको थियो । स्वास्थ्यमन्त्री ढकालले औषधि व्यवस्था विभागको मर्यादाक्रम नमिलेको भन्दै सच्याउने बताएका थिए । सोही अनुसार मंगलबार पुनः नारायण ढकाललाई जिम्मेवारी दिइएको हो ।