पक्राउ परेका चिनियाँ स्वदेश फर्कँदै, चार वर्ष नेपाल प्रवेशमा रोक

काठमाडौं - काठमाडौंका विभिन्न ठाउँबाट अवैध गतिविधि गरेको आरोपमा पक्राउ परेका १२२ जना चिनियाँ नागरिकलाई बुधबार चीन पठाउन लागिएको छ।

नेपालस्थित चिनियाँ दूतावासले सोमबार अध्यागमन विभागलाई नेपालमा पक्राउ परेका १ सय २२ जनाको इन्ट्री परमिट बुझाएपछि उनीहरु चीन फर्किन लागेका हुन्।

उनीहरुलाई लिन बुधबार चीनका दुईवटा विमान नेपाल आउँदैछन्। चाइना साउदर्न र चाइना इस्टर्नका दुईओटा विमान बुधबार काठमाडौं आइपुग्दै छन्। विभागका अनुसार ८८ जनालाई जनही १ हजार रुपैयाँ र ३४ जनालाई २ हजार रुपैयाँका दरले जरिवाना गरिएको छ। यो रकम नेपालस्थित चिनियाँ दूतावासले तिरिदिएको बुझिएको छ।

पक्राउ परेकामध्ये ६७ जनासँग पासपोर्टसमेत नरहेकाले चिनियाँ दूतावासले ‘इन्ट्री डकुमेन्ट’ अध्यागमन विभागलाई उपलब्ध गराएको छ। उनीहरुलाई ४ वर्ष नेपाल प्रवेशमासमेत प्रतिबन्ध लगाइएको छ।

नेपाल प्रहरीको केन्द्रीय अनुसन्धान ब्यूरोको नेतृत्वमा महानगरीय प्रहरी परिसर काठमाडौं र अपराध महाशाखाको टोलीले पुस ७ गते काठमाडौंका विभिन्न स्थानमा छापा मारी चिनियाँहरुलाई पक्राउ गरेको थियो।

नेपालमा बसेर चीनमा अनलाइन जुवा, बैंकिङ कसुर र अनलाइनमा अश्लील यौनजन्य सामग्रीको अवैध कारोबारमा संलग्न उनीहरु पर्यटन भिसामा नेपाल आएका थिए।