प्रदेश ३ को स्थायी राजधानी र नाम भोलि टुंगो लाग्‍ने

हेटौँडा- प्रदेश ३ को स्थायी राजधानी र नामाकरणको विषय भोलि (मंगलबार) टुंगो लगाउने गरी आज (सोमबार)बाट प्रक्रिया सुरु गरिने भएको छ ।

सोमबारबाट सुरु हुने प्रदेशसभाको पाँचौ अधिवेशनमा प्रदेशको स्थायी राजधानी र नामाकरण टुङ्गो लगाउन औपचारिक रुपमा प्रक्रिया शुरु हुने भएको हो ।

प्रदेशसभाको सोमबारको बैठकमा प्रदेशको स्थायी राजधानी तोक्नेसम्बन्धी कार्यविधिमाथि छलफल गर्ने कार्यतालिका तय गरिएको छ ।

प्रदेशको स्थायी राजधानी तोक्नेसम्बन्धी कार्यविधिमाथि छलफलसँगै प्रदेशको नामाकरणसम्बन्धी कार्यविधिमाथि छलफल गरी पारित गर्ने र प्रदेशको नाम प्रस्ताव गर्न माग गर्ने कार्यतालिका तय भएको प्रदेशसभाका सभामुख सानुकुमार श्रेष्ठले जानकारी दिए ।

आइतबार पत्रकार भेटघाटमा सभामुख श्रेष्ठले राजधानी तोक्ने र नामाकरणका लागि मतदान प्रक्रियामा जाने बताएका हुन् । उनले भने, सबै प्रक्रिया पूरा गरेर प्रदेशको स्थायी राजधानी र नाम मङ्गलबार टुङ्गो लगाउने गरी तय गरिएको छ ।

यसअघि प्रदेशको स्थायी राजधानीसम्बन्धमा अध्ययन गर्न बनेको राजधानी अध्ययन विशेष समितिले बर्णानुक्रमअनुसार काभ्रे, चितवन, नुवाकोट, भक्तपुर र मकवानपुर जिल्लासहितको सम्भावित सूची सिफारिश गरेको थियो ।

बर्णानुक्रमअनुसार सिफारिश भएका जिल्लाको कुन स्थानमा राजधानी राख्ने हो प्रदेश सभाको वैठकमा प्रस्ताव माग गर्ने प्रदेशसभाका प्रदेशसभा सचिव रामशरण घिमिरेले जानकारी दिए ।

बर्णानुक्रमअनुसार सबैभन्दा पहिले स्थायी राजधानी तोक्न काभ्रे जिल्लाको प्रस्तावित स्थानका लागि मतदान हुने भएको छ । मतदान गर्न पक्षमा हुने र विपक्षमा हुने प्रदेश सभाका सदस्यको छुट्टाछुट्टै लाइन र स्थान प्रदेश सभा भवन भित्र व्यवस्था गरिने भएको छ ।

सभामुखले मतदान प्रक्रिया सुरु हुने सभामुखले जानकारी दिएपछि पाँच मिनेटसम्ममा प्रदेश सभा भवनमा प्रवेश गर्न दिने समय निर्धारण गरिने र सो समयभित्र नआउने प्रदेश सभाका सदस्यलाई मतदानस्थलमा प्रवेश नगराइने प्रदेश सभा सचिवालयले जनाएको छ ।