‘नेकपाको सचिवालय मिलेको छैन, भीम रावल र अष्टलक्ष्मी शाक्यलाई पनि राखौं’

धनगढी– सत्तारुढ दल नेपाल कम्युनिस्ट पार्टी (नेकपा) का वरिष्ठ नेता तथा पूर्व प्रधानमन्त्री माधवकुमार नेपालले नेकपाको सचिवालय नमिलेको टिप्पणी गरेका छन्। धनगढीमा पुष्पलाल मिलन केन्द्रले आयोजना गरेको कार्यक्रममा नेता नेपालले सचिवालय अपूर्ण रहेको बताएका हुन् ।

पूर्व एमालेका उपाध्यक्षद्वय भीम रावल र अष्टलक्ष्मी शाक्यलाई पनि सचिवालयमा ल्याउनुपर्ने आशय नेता नेपालले व्यक्त गरे । सचिवालय जसरी मिलाउनुपर्ने हो, त्यो अलिकति नमिलेको उनले बताए । उपाध्यक्ष ठूलो पद भएका कारण पूर्व एमालेको हकमा ती उपाध्यक्षबाट पनि सचिवालयमा ल्याउनुपर्नेमा उनको जोड थियो । रावल र शाक्यलाई सचिवालयमा ल्याउँदा सुदूरपश्चिम प्रदेश र महिलाको पनि प्रतिनिधित्व हुने उनले बताए ।

नौ सदस्यीय सचिवालयलाई १५ सदस्यीयसम्म बनाउन सकिने उनले सुझाव दिए । नेता नेपालले पार्टी एकताबद्ध हुन आवश्यक रहेकोमा जोड दिए ।