आज मानव अधिकार दिवस, राष्ट्रपतिबाट यस्तो शुभकामना

काठमाडौं- आज ७१ औं अन्तर्राष्ट्रिय मानव अधिकार दिवस, नेपालमा पनि विभिन्न कार्यक्रम गरी मनाइदैं छ ।

सन् १९४८ डिसेम्वर १० मा संयुक्त राष्ट्रसंघको महासभाले मानवअधिकारको विश्वव्यापी घोषणा पत्र जारी गरेको दिनको सम्झनामा हरेक वर्ष आजकै दिन विश्वभर यो दिवस मनाउने गरिन्छ ।

दिवसका अवसरमा बिहान राष्ट्रिय मानव अधिकार आयोगको आयोजनामा प्रभातफेरी निकालिएको छ । आजैबाट ११ औं मानव अधिकार राष्ट्रिय महाभेला पनि सुरु हुँदैछ । सन् २००९ बाट नेपालमा मनाउन थालिएको महाभेला यसपटक सप्ताहव्यापी रुपमा मनाउन लागिएको हो ।

महाभेलाको अवसर पारेर गैर सरकारी संस्था महासंघले यो वर्षदेखि ३ वटा सम्मान र पुरुस्कार पनि वितरण गर्ने भएको छ ।

यसैबीच दिवसको अवसरमा शुभकामना दिदैँ राष्ट्रपति विद्यादेवी भण्डारीले मानव अधिकारको सम्मान, संरक्षण, सम्वद्र्धन तथा प्रभावकारी कार्यान्वयनमा जोड दिएकी छिन् ।

उनले सन्देशमा भनेकी छिन्, “यस दिवसले सम्बद्ध पक्ष र निकायलाई मानव अधिकारको मर्म र भावनालाई आत्मसात् गर्दै मानव जातिका साझा अधिकार प्रत्याभूति गर्न सबैलाई सफलताका साथै यस क्षेत्रमा काम गर्न थप ऊर्जा र प्रेरणा मिलोस् भन्ने कामना गर्दछु ।”