नेपालले १३औं सागमा बनायो सर्वाधिक स्वर्णको कीर्तिमान

काठमाडौं– नेपालले दक्षिण एसियाली खेलकुद प्रतियोगिता (साग)को एकै संस्करणमा सबैभन्दा बढी स्वर्ण जित्ने कीर्तिमान बनाएको छ। बुद्धिबहादुर तामाङले साइक्लिङमा नेपालका लागि ३२औं स्वर्ण जितेसँगै नयाँ कीर्तिमान बनेको हो।

नेपालले २० वर्षअघिको अर्थात सन् १९९९ मा नेपालमै भएको आठौं सागमा ३१ स्वर्ण जितेको थियो। जारी १३औं सागको पाँचौं दिनमा उक्त रेकर्ड टुटेको छ। नेपालका लागि लक्ष्मी मगरले बराबरी अर्थात् ३१ औं स्वर्ण दिलाएकी थिइन्। नेपाललाई पहिलो स्वर्ण मन्डेकाजी श्रेष्ठले दिलाएका थिए।

आठौं सागमा नेपालले ३१ स्वर्ण जितेको थियो। त्यतिबेला नेपालले कराते र तेक्वान्दोमा १४–१४, बक्सिङमा दुई र पौडीबाट एक स्वर्ण जितेको थियो।

जारी सागमा यो समाचार तयार पार्दासम्म नेपाल ३२ स्वर्ण, १७ रजत र २९ कांस्य गरी कूल ७८ पदक जित्दै पदक तालिकाको दोस्रो स्थानमा रहेको छ भने ३८ स्वर्णसहित भारत पहिलो स्थानमा रहेको छ।