जनकपुरधाम– जसपाबाट अलग भएर दर्ता भएको लोकतान्त्रिक समाजवादी पार्टी (लोसपा) का लागि प्रदेश २का प्रदेशसभा सदस्यहरुले आज बुधबार सनाखत गराएका छन्।
जसपा छोडेर नयाँ पार्टीमा प्रवेश गरेका प्रदेश २ का ११ जना प्रदेश सभा सदस्यहरुले निर्वाचन आयोगको कार्यालय पुगेर सनाखत गराएका हुन्। निर्वाचन आयोगले नयाँ दलमा जान चाहने जनप्रतिनिधिहरुलाई भदौ २२ गतेसम्मको समय दिएको छ ।
लोसपाको पक्षमा जसपा छोडेर ११ जना प्रदेशसभा सदस्यहरुले आज सनाखत गराएको र बाँकी रहेका प्रदेश सभा सदस्यहरुले बिहीबार सनाखत गराउने लोसपाका नेता जितेन्द्र सोनलले जानकारी दिए।
लोसपाको पक्षमा सनाखत गर्ने प्रदेशसभा सदस्यहरुमा सुरिता साह, जयनुल राइन, बबिता चौधरी, निलम देवी भूमिहारिन, अलका झा, गौरीनारायाण साह, जानकीशरण साह, परमेश्वर साह, रमेशप्रसाद कुर्मी, बाबुलाल साह र उपेन्द्र महतो रहेका छन् ।
जितेन्द्र सोनल, अभिराम शर्मा लगायतका प्रदेशसभा सदस्यहरुले बिहीबार सनाखत गराउने जनाइएको छ। प्रदेश २ को प्रदेशसभामा तत्कालिन समाजवादी पार्टीबाट ३० र तत्कालिन राजपाको तर्फबाट २५ गरी ५५ जना सदस्य छन्।