प्रहरी नायव निरीक्षक र चालक घुससहित नियन्त्रणमा

काठमाडौं- बाराको गञ्जभवानीपुर प्रहरी चौकीमा कार्यरत प्रहरी नायब निरीक्षक जटाशंकरप्रसाद कलवार र सिराहा जिल्ला अदालतका सवारी चालक व्रिजमोहन यादवलाई अख्तियारको टोलीले घुस रकमसहित नियन्त्रणमा लिएको छ।

अख्तियार दुरुपयोग अनुसन्धान आयोगका अनुसार कलवार ६० हजार र यादब १ लाख १० हजार घुससहित रंगेहात पक्राउ परेका हुन्।

कलवारले भारतबाट मालसामान ल्याउन सहज गराई दिने भनी सेवाग्राहीसँग घुस लिएको र यादवले अदालतमा विचाराधिन लागु औषधसम्बन्धी मुद्दा मिलाई दिन्छु भनी घुस लिएको आयोगका प्रवक्ता प्रदीपकुमार कोइरालाले जानकारी दिए।

कलवारलाई कलैया उपमहानगरपालिका–४ स्थित, श्रीराम खाद्य उद्योग र यादवलाई सिराहा नगरपालिका–७ हस्पिटल चोकस्थित खड्ग होटलबाट घुस रकमसहित विहीबार रंगेहात पक्राउ गरेको अख्तियारले जनाएको छ। उनीहरुलाई नियन्त्रणमा लिई अनुसन्धान भइरहेको अख्तियारले जनाएको छ।