‘हाई प्रोफाईल’ जुवाडेलाई धरौटीमा छोड्न सर्वोच्चद्वारा अस्वीकार

काठमाडौं- जुवा खेलिरहेको अवस्थामा काठमाडौंको महाराजगंजबाट ठूलो रकमसहित पक्राउ परेका जुवाडेलाई धरौटीमा रिहा गर्न सर्वोच्च अदालतले अस्वीकार गरेको छ।

शनिबार राती जुवाखालबाट २ करोड ६७ लाख नगद तथा केही चेकसहित पक्राउ परेका २५ जनामध्ये ६ जनाले आफूहरुलाई गैरकानूनी थुनामा राखिएको भन्दै बन्दी प्रत्यक्षीकरणको रिट हालेका थिए।

बुधबार उनीहरुको रिटमा सुनुवाई गर्दै सर्वोच्च अदालतका न्यायाधीश पुरुषोत्तम भण्डारीको इजलासले धरौटीमा छोड्न नसकिने ठहर गरेको हो। ६ जना हाई प्रोफाइल जुवाडेको बन्दी प्रत्यक्षीकरणको रिट अस्वीकृत भएसँगै बाँकी १९ जना पनि हिरासतमै रहने भएका छन्।

शनिबार जुवाको खालबाट पक्राउ परेकामध्ये हाई प्रोफाइल भएका क्यासिनो किङ भनेर चिनिने बलराम सापकोटा ‘बले’ ठेकेदार पवनकुमार गुप्ता, उद्योगी श्रवणकुमार गोयल, एयर डाइनेष्टीका सञ्चालक पवित्रकुमार कार्की, जुवा खेलाउने विक्रम गौतम र मुक्ती लामाले सर्वोच्चमा बन्दी प्रत्यक्षीकरणको रिट दायर गरेका थिए।